Naigo sa kilat patay

CEBU, Philippines — Patay ang  usa ka mananagat nga naigo sa kilat samtang kini nanagat sa kadagatan sa Barangay Ibo,  Dakbayan sa Lapu-Lapu Sabado sa gabii.

Si Police Officer  3  Marvin Saraum sa Homicide Section sa Lapu-Lapu City Police Office (LLCPO)  miila sa namatay nga mao si Danilo Cagang Cañete, 42 , taga Purok Camote, Barangay Calero sa Lungsod sa Liloan.

Matud pa ni Saraum nga nagluwan sa iyang sakayan ang biktima samtang nanagat sa maong lugar sa dihang kalit lang mibundak ang kusog nga uwan ug nagpangilat ang kalangitan.

Kalit lang nilanog ang buto sa kilat ug nakaigo kang Cañete kinsa namasol nianang tungora.

Usa ka mananagat nga naila lang sa pangalan nga Arnold ang nakakita sa hitabo ug daling nipadaplin ug nangayo og tabang sa mga barangay tanod sa Barangay Ibo kinsa mao usab ang nitawag sa kapolisan aron makuha ang namatay gikan sa dagat.

Diha gihapong dapita sa miaging tuig nahitabo kadtong duha ka babayeng nanginhas nga  naabtan sa paspas nga pagsaka sa tubig tungod sa unos ug nakaingon sa ilang pagkalumos.

Ang duha nakit-an didto na sa Ormoc City sa Leyte paglabay sa pipila ka mga adlaw. (BANAT NEWS)