Naga nagpahigayon og post disaster assessment
CEBU, Philippines — Gilauman nga taas og sagubangon ang kagamhanan sa Dakbayan sa Naga alang sa rehabilitasyon ug recovery sa mga barangay nga naapektohan sa landslide niadtong Septiyembre 20.
Si Naga City Councilor Carmelino “Junjie” Cruz, Jr., pangulo sa City Disaster Risk Reduction and Management Office nagkanayon nga ang kagamhanan sa siyudad nagpahigayon karon og Post Disaster Needs Assessment.
Tumong niini nga makagama og mga lakang ang kagamhanan sa siyudad nga mabalik sa normal ang mga naapektohang barangay.
Matud ni Cruz nga ang inputs nga nakuha gikan sa assessment mahimong basehan sa pagbuhat sa mga konkretong programa ug kalihukan alang sa Recovery and Rehabilitation Plan.
Ang mga kawani sa city hall ug kabarangayan nagtinabangay sa paggama og baseline data gathering.
Gibutyag ni Cruz nga usa sa mga dagkong panginahanglan mao ang pag-re-channel sa Pangdan River diin ang bahin niini natakuban human nga nidahili ang bukid sa Sitio Tagaytay.
Gawas niini, ang mga apektadong pamilya nagkinahanglan usab kini og livelihood assistance aron makasugod sila og panginabuhian. (/BDB)(BANATNEWS)
- Latest
