CEBU, Philippines — Apostolic Administrator of the Military Ordinariate of the Philippines ug kasamtangang Team Moderator sa Sto. Rosario Parish, Auxiliary Bishop Oscar Florencio, niawhag sa katawhan nga ipadayon gihapon ang pag-ampo sa Oratio Imperata aron ang nagpasiugda sa sunod-sunod nga pagpamatay hikapon kini ug dili na kini magpadayon.
Matud ni Florencio nga dili gyud ikalipay ang sunod-sunod nga patay hinungdan nga maoy iyang pangaliyupo sa mga nagpasiugda niini nga dili kini ipadayon tungod kay dili kini maoy plano sa Ginoo. Sumala pa ni Florencio nga tungod sa sunod-sunod nga patay, nakapahadlok kini sa katawhan diin wala nay kalinaw hinungdan nga ang nagbuhat sa maong pagpamatay iampo nga mohunong na tungod kay kung Ginoo na ang molihok mahunong man kini.
Dugang pa ni Florencio nga isip Apostolic Administrator sa Military Ordinariate, mas maayo nga dili magbinasolay ang katawhan ug ipadayon gihapon ang pag-ampo kay uban sa iyang mga chaplains sa kanunay usab sila naghatag og giya sa mga sakop sa “men and women in uniform” nga dili gyud maayo ang pagpamatay og tawo.
Gibutyag ni Florencio nga angay lang usab paaboton ang mga gihimo nga imbestigasyon batok sa mga “men and women in uniform” ilabi na kadtong mga gireklamo sa pipila ka tawo.
Gitug-an ni Florencio nga sila sa Military Ordinariate kauban sa iyang mga chaplains adunay mga kalihukan nga gipahigayon alang sa guidance sa mga “men and women in uniform” lakip na niini ang paghatag nila og kahigayunan nga makapahuway aron makatabang sa ilang tagsa-tagsa ka kaugalingon. (/GMR)(BANATNEWS)