Quarry suspension sa Central Visayas gilibkas na

CEBU, Philippines — Pagsuspenso sa walo ka large scale quarry ug 15 ka industrial sand and gravel operations (ISAG) sa Central Visayas gilibkas na human gihatagan og clearance nga mahimo na nga mo-operate gikan sa Mines and Geosciences Bureau sa kaulohan. Humana gisusi sa mga geologists ug mining engineers sa MGB-7 ang safety ug geo-hazard survey sa komunidad sa maong mga quarry operations.

Niadtong Biyernes si MGB-7 acting Director Efren Carido nipirma sa paglibkas sa suspensiyon human sa clearance nga gihatag ni MGB Director Wilfredo Moncano. Ang gihatagan na og go signal nga maka-operate mao ang Solid Earth Development Corp. sa San Fernando, Cebu; Dolomite Mining Corporation sa Alcoy, Cebu; Bohol Limestone Corporation sa Garcia-Hernandez, Bohol; Lazi Bay Resources Development, Inc. sa Lazi, Siquijor; JLR Construction and Aggregates, Inc., sa Cogon, Naga City; Heirs of Arturo Zayco sa Ayungon, Negros Oriental; ug Republic Cement and Building Materials, Inc, sa Danao City, Cebu.

Ang suspensiyon sa operation sulod sa MPSA sa Quarry Ventures Philippines, Inc. gilibkas na sab gawas lang sa operation sa usa ka parcel sa permit area. Ang operation sa Apo Land and Quarry Corporations sa Naga City ang padayon gihapong suspendido tungod sa nagpadayon nga imbestigasyon sa MGB sa nahitabong landslide sa Sitio Sindulan Tinaan, Dakbayan sa Naga. Samtang ang 15 ka ISAG nga gihatagan og pagtugot sa MGB naglangkub sa WTG Construction and Development Corp. sa Combado, Balamban; Balamban Construction and Marine Services Ltd. Co sa Biasong, Balamban; Stanley S. Chona sa Liki ug Cabagdalan, Balamban; Annette J. Navarro sa Liki, Balamban; Gimar A. Besañes sa Media Once sa Toledo City; Ma. Celeste L. Dolino sa Dumlog, Toledo City; Ophelio L. Dolino sa Capitan Claudio, Toledo City; ug Merriam Jane B. Dumadag sa Cambang-ug, Toledo City; Arlene T. Borja sa Biga, Toledo City; Mervin R. Teo sa Lagtang, General Climaco, Toledo City; Humprey R. Benitez sa General Climaco, Toledo City; Willy U. Te’s Jute Rocks, Inc. sa New Bago, Agbanga ug Sta. Rita, Asturias; Ceilito T. Bardenas sa Sta. Rita, Asturias; Anna B. Suba sa Arpili, Balamban; ug Oliver Sobere Yu sa Ayungon, Negros Oriental.

Ang 15 ka adlaw nga suspensiyon sa tanang quarry operations sa Region I, III, IV-Calabarzon, V, VII, X, XI ug XIII mando ni DENR Secretary Roy Cimatu human sa nahitabong landslide sa Naga. (BANAT NEWS)