Kanhi kongresista Cuenco mag-konsehal

CEBU, Philippines — Magpapili sa pagka-konsehal sa Dakbayan sa Sugbo ang beteranong politiko ug magbabalaud nga si kanhi kongresista Antonio Cuenco.

Kini sukwahi sa tambag sa iyang banay ug suod nga mga higala nga siya mopahuway na sa politika.

“Maoy akong tuyo nga ang ubang katuigan sa akong kinabuhi akong itaga pag-alagad sa akong kaigsoonan sa dapit diin ako gipanganak,” matud ni Cuenco. Matud niya nga ang bulawanong katuigan sa iyang kinabuhi gigahin sa Ubos Balay Balauranan sa nasud sa Manila sulod sa 25 ka tuig.

Usa sa labing mahinungdanong balaud nga napanday ni Cuenco ang Local Government Code of 1991, Comprehensive Dangerous Drugs Act of 2002 ug Baseline Law of 2007.

Si Cuenco gipili sab nga kalihim-heneral sa Association of Parliamentarians sa ASEAN Region niadtong 2010 diin sa Jakarta, Indonesia siya nagbase sulod sa tulo ka tuig. (BANAT NEWS)