Pagpatrolya sa mga tanod pahingusgan

CEBU, Philippines — Giawhag ang tanang 1,600 ka barangay tanod sa Dakbayan sa Sugbo nga hingusgan ang ilang foot patrol aron pagpakgang sa krimen.

Kagahapon ang pangulo sa Cebu City Office for Substance Abuse Prevention (COSAP), Garry Lao, nipagawas og memorandum nga naghangyo sa mga barangay tanod sa pagpalambo pa sa ilang peace and order measures.

Kini subay sa nahitabo sa usa ka call center agent nga gipusil patay sa Barangay Mabolo sa niaging semana.

Nagkanayon si Lao nga ang iyang buhatan mo-monitor sa performance sa matag tanod pinaagi sa pag-submit og individual accomplishment report ug daily time record nga gipirmahan sa ilang mga hepe.

Ang tanang tanod gi-require sa pag-submit og accomplishment report sa dili pa ma-release ang ilang binuwan nga allowance nga nagkantidad og P4,000. Sigun ni Lao nga nasayud siya nga ang mga tanod nagpahigayon og foot patrol sa ilang mga lugar ang gikinahanglan gihapon sila pahinumduman nga kini hingusgan.

Dugang ni Lao nga ang presensiya sa mga tanod makatabang sa kapolisan aron mapakgang ang krimen nga usa sa nag-unang problema sa siyudad.

“Well at least mas maayo naay visibility gyud kay ang kapolisan they cannot roam around 24 hours, if mag-roving ang tanods at least ma-minimize ang crime,” dugang ni Lao.

Si Konsehal Joel Garganera, chairman sa Peace Advisory Council, nakita niya nga usa kini ka maayong lakang sa executive department sanglit concern sa tanan ang mahitungod sa peace and order.

“I think that it’s good, but I think it should also be the initiative of the barangay captains to maintain peace and order in their respective barangay,” sigun ni Garganera.

Nalatid sab sa maong memorandum nga ang tanang tanod mopaubos og pagbansay-bansay sa self-defense ingon man sa gun use ug safety nga ipahigayon sa first quarter sa 2019. (BANAT NEWS)