P30M budget pangayuon sa CPADAO

CEBU, Philippines — Dili mominus sa P30 milyones ang pangayoon nga pundo sa Cebu Provincial Anti-Drug Abuse Office (CPADAO) alang sa tuig 2019.

Gitug-an sa pangulo sa CPADAO, Ivy Durano–Meca nga wala pay labot sa P30 milyones ang P16 milyones nga pundo alang sa operation sa gitukod nga rehabilitation center sa Lungsod sa Pinamungajan.

Ang Pinamungajan Project New Life – Cebu Provincial Rehabilitation Center ang kasamtangan na karon nga gitrabaho sa 2,000 metro kwadrado nga luna sa compound sa Jose Ma. Borromeo Memorial Hospital sa maong lungsod.

Ang maong pasilidad adunay dili mominus 100 ka higdaanan alang sa mga drug surrenderers o kadtong mga tiggamitan og ilegal nga drugas nga kinahanglang ipaubos sa rehabilitasyon.

Ang Project New Life – Cebu Provincial Rehabilitation Center gitukod kini sa usa ka telecommunication company diin gipaabot nga mahuman sa katapusan karong tuiga og mamahimo nga operational sa tuig 2019.

Matud ni Meca nga kinahanglan pundohan ang operasyon sa maong pasilidad.

Ang P30 milyones nga isugyot nga pundo sa CPADAO igahin kini sa special programs sa maong buhatan lakip na sa padayon nga drug-clearing program sa mga barangay, pagsustenir sa community-based treatment program ingon man sa Maintenance and Other Operating Expenses (MOOE) niini. (/GMR)(BANATNEWS)