Naga landslide tukion sa PB

CEBU, Philippines — Tukion sa Provincial Board sa Sugbo atol sa ilang sesyon karong hapon ang nahitabong landslide sa Dakbayan sa Naga nga nikalas og daghang kinabuhi.

Gidapit sa pagtambong ang mga opisyal sa mga hingtungdang buhatan aron mopatin-aw sa daghang pangutana labot sa insidente.

Kini naglakip sa pangulo sa Provincial Disaster Risk Reduction and Management Office (PDRRMO) nga si Baltazar Tribunalo Jr., pangulo sa Provincial Environment and Natural Resources (PENRO) nga si Jayson Lozano; ug hepe sa Mines and Geosciences Bureau (MGB) nga si Engr. Efren Carido.

Apil sa giimbitar ang mga opisyal sa League of Municipalities of the Philippines nga gipangulohan ni Tuburan Mayor Democrito Diamante.

Si Gobernador Hilario Davide III una na nga nihangyo sa PB nga mohimo og imbestigasyon sa nahitabo nga landslide sa Dakbayan sa Naga nga nikalas og 78 ka kinabuhi.

Karong adlawa sab tukion sa PB ang pagdonar sa luna sa Balili property aron himoong relocation site sa mga biktima sa landslide. (/GMR)
Lider sa mga kawatan nasikop sa Bacolod

Nadakpan kagahapon sa kaadlawon atol sa buy-bust operation sa Bacolod City, Negros Occidental ang lider sa grupo sa mga kawatan kinsa giingong maoy niatake sa duha ka unibersidad sa Moalboal ug Dumanjug ug usa ka lending firm sa Dumanjug sa Lalawigan sa Sugbo.

Ang gitumbok nga lider giila sa kapolisan nga si Joric Cataraja Epogon, 21, samtang kuyog ang usa ka menor de edad.

Si Senior Inspector Bonifacio Pareja, hepe sa Dumanjug Police Station, niingon nga gipadangat niya ang kaso sa grupo sa kadagkoan sa kapolisan sa Bacolod City.

Nasuta nga nalambigit sa pagpayuhot og shabu ang grupo hinungdan nga gipahigayon ang buy-bust operation. Gitawag og Epogon Brothers ang grupo nga gilangkuban sa iyang mga igsoon nga sila si Eddie Epogon ug Jun-jun Epogon, ug paryente nga si alyas Baby Face ug ang kababata ni Joric nga si Dave Guiwan, 21-anyos, kinsa pulos taga Sipalay City, Negros Occidental.

Matud ni Pareja nga modus sa maong grupo nga modayo og mga lugar aron mangawat sa mga dagkung establisemento.

Ang lima maoy gitumbok nga nangawat sa usa ka lending firm sa Poblacion, Dumanjug niadtong Agosto diin nikabat og P200 mil ang ilang nakawat.

Kini human positibong nakit-an ang ilang mga dagway sa closed-circuit television sa opisina.

Niadtong Septiyembre 9, gilungkab sab sa maong grupo ang usa ka unibersidad sa Moalboal diin P400 mil ang ilang nakuha.

Nakita sab sa CCTV ang ilang mga dagway matud ni Pareja.

Gisundan kini niadtong Septiyembre 24 diin sunod nga gilungkab mao ang branch sa maong unibersidad sa Dumanjug diin P40 mil ra ang ilang nakuha.

Matud sa hepe nga nagkalalis ang grupo sulod sa ilang gipuy-an nga lodge sa Dumanjug.

“Tulo ra man gud ang ni-atake didto, ang duha nagpabilin ra sa lodge. So pagbalik sa tulo wa seguro nituo ang duha nga gamay ra ang nakuha, kay lagi daku ang nakuha pag niagi, mao to nga nag-awayay na,” matud ni Pareha.

Giingong gipusil sa ulo ug namatay ang ilang kauban nga si Guiwan ug dayon gibiyaan.

Pagsubay sa kapolisan nahabilin ang identification card ni Eddie hinungdan nga nasuta nila nga taga Sipalay ang maong grupo.

Gawas sa kaso sa drugas, nag-atubang sab og kasong pagpangawat ang mga suspek ingon man murder sa pagpatay kang Guiwan.

Sila si Eddie ug Jun-jun giingong kasamtangang gipangita karon sanglit apil sab sila sa kasong murder ug pagpangawat.

“Mao gyud na binuhatan sa ilaha. Ilang amahan gani (sa managsuong Epogon) napriso sad karon didto for robbery,” matud ni Pareja. (/GMR)(BANATNEWS)