Anggulo sa drugas ang gisubay

CEBU, Philippines – Anggulo sa drugas ang gitan-aw karon sa kapulisan sa kamatayon sa lima ka tawo, nga napalgan sa Sitio Kan-Irag Barangay Malubog siyudad sa Sugbu, niadtong Huwebes sa buntag.

Kini base sa nakuhang 150 gramos nga gidudahang shabu sa sulod sa puti nga van diha sa crime scene nga mokabat kapin P1 milyon.

Giila ang mga biktima nga sila si Christopher Tangag, 23; taga Barangay Basak San Nicolas; Carl Cabahug, 20, taga Sitio Camansi Barangay Lorega; Leyster Abella, 26, taga Lucio Drive, Barangay Calamba; Rolando Tayor, 29, taga A. Lopez Barangay Labangon ug Dirovan Sarijorjo.

Duha ka mga giingong nakaikyas apan dili managkaila nga sila si Antonio Belande ug Charmaine Puran mibutyag sa interbyu sa mga tigbalita nagtuo sila nga mga polis ang nihimo sa maong krimen ngadto kanila.

Apan si PRO-7 Direktor Debold Sinas mihimakak niini ug miklaro nga wala mag-ingon niini ang duha.

Sa usa sa mga interbyu kang Puran nga nag-viral sa social media, siya mitug-an nga naghatud sila og “stock” nga ang gipasabot shabu.

Si Sinas miingon nga si Puran ang ilang gipaabot nga motingog kay nagtuo sila nga aduna kini mga nahibaw-an bahin sa kinsay nagpaluyo sa maong pagpatay. (Mae Clydyl Avila/IBM)

Sinas andam manaog sa pwesto,

mihimakak sa Malubog-shootings

Kon gustohon sa iyang mga labaw, andam manaog sa pwesto si Police Regional Office -7 direktor Debold Sinas nunot niining mga sagunson nga panghitabo sa pagpatay ug gipasanginlan ang iyang mga sakop nga nalambigit niini.

“If ugma moestorya si Chief PNP nga ‘Sinas relieve ka na’, muana ko ‘Thank you.’  Why should I step down? Tungod lang sa ila gipangsulti? I will, if there will be orders,” sigon pa ni Sinas.

Gihimakak ni Sinas nga apil ang pulis sa nahitabo sa Malubog bisan nainterbyu sa sibyaanang DySS ug DyAB ang duha ka mga nakaikyas nga silang Antonio Belande ug Charmaine Puran nga unang nag-ingong pulis ang ilang gidudahang ni-pickup ug mirakrak kanila nga niresulta sa kamatayon sa laing lima ka tawo. Si Sinas miinsister nga “shocked” pa ang duha ug dili angay tuohan ang maong interbyu kay sa dihang siya maoy nakahinabi sa duha wala sila moingon nga pulis ang ilang gipasabot. “Nakaestorya na nako ang duha and sila mismo miingon nga dili pulis ang nagbuhat niini,” si Sinas miingon.

Gipasanginlan ni Sinas ang media ang nagsulsol nga pulis ang nibuhat sa pagpamusil base sa pamaagi sa pagpangutana. “Ang mga biktima, gipangutana nga ‘Pulis?’ ‘Pulis?’ Ang biktima nga under shock and trauma mag-uyon uyon lang… We are not involved. The victims were emotionally unstable, dili sila kahatag og tarong statement. Mao akoang giingon dili sa mi mokuha sa statements unless okay na,” dugang pa ni Sinas. (/IBM)(BANAT NEWS)