CEBU, Philippines – Ang Archdiocese of Cebu nangandam og mga kalihukan atol sa unang higayon sa pagbisita nganhi sa Sugbo karong Oktubre 11 hangtud 14 sa kasing-kasing ni San Pio.
Usa ka Santos nga Misa ang ipahigayon sa alas 10:30 sa buntag karong Oktubre 11, adlaw nga Huwebes isip welcome mass diha sa Cebu Metropolitan Cathedral nga pangulohan ni Archbishop Jose Palma.
Sa gabii sa maong adlaw ipahigayon ang procession ug veneration hangtod na sa pagbalhin niini ngadto sa Cebu International Convention Center alang sa kalihukan sa kaparian ug consecrated persons sa Visayas.
Sa Oktubre 14, adlaw nga Domingo usa ka farewell mass ang ipahigayon sa alas 6:00 sa buntag nga pagadumalaon ni Auxiliary Bishop Dennis Villarojo.
Ang kasing-kasing ni San Pio mobisita nganhi sa Pilipinas alang sa kasaulogan sa centenary sa stigmata ug 50th anniversary sa kamatayon niini ug lakip ang kasaulogan sa year of the clergy ug consecrated persons.
Matud ni Archbishop Jose Palma nga usa kini ka maayong oportunidad ilabi na sa mga nagdeboto kang San Pio ug sa wala pa makaduaw sa iyang kasing-kasing nga wala madugta diin pipila lang ka Santo ang susama kang San Pio.
Ang kasing-kasing ni San Pio timaan nga puno sa gugma ug grasya sa Ginoo hinungdan nga daghan ang nagtuo nga milagroso kini.
Dugang ni Palma nga angay ipadangat ngadto sa katawhan ang ilang mga intention ug pag-ampo ug pagpasidungog sa kasing-kasing ni San Pio alang sa kalinaw. (/BDB)(BANAT NEWS)