CEBU, Philippines – Gitawag sa Division for the Welfare of the Urban Poor (DWUP) Cebu City ang atensiyon sa publiko kinsa nagtinguha nga mopahimulos sa “Let There Be Light” program nga magmabinantayon aron dili mabiktima niining mga mangingilad.
Ang Operations Head sa DWUP Genevieve Alcoseba miingon nga nakadawat og daghang reklamo si Cebu City Mayor Tomas Osmeña nga dunay mga aplikante ang matud pa migasto og lapas P5,000 pagpataod og linya sa kuryente.
“Ni-text directly didto ni Mayor regarding aning alleged nag-apply daw sila aning Let There Be Light sa City Hall then they we able to pay gipabayad daw sila sa mga naa daw diha sa ubos somewhere diha dapit sa OBO og tag P10 mil so we understood maybe those are fixers,” ni Alcoseba pa.
Ang programa gilusad niadtong 2012 atol sa administrasyon ni kanhi mayor Michael Rama nga nagtinguhang motabang sa mga kabus nga makapataod og koneksiyon sa kuryente pinaagi sa pagtabang sa siyudad aron makamenus sa bayrunon.
Gikan niadtong 2016 hangtod kagahapon miabot na sa kapin 3,000 ka mga konstituwente ang nakapahimulos sa programa. Sigon ni Alcoseba ang standard nga bayrunon sa mga aplikante moabot lang og P4,000 ngadto na sa P5,000 hinungdan awhag niya sa mga aplikante nga direktang moadto sa buhatan sa DWUP aron masayod sa saktong proseso. Sa pag-adto sa DWUP ang aplikante mobayad og P40 alang sa DWUP Certification, P296 sa OBO fee ug ang uban alang sa electric connection fee.
Matud ni Alcoseba nga importante kaayo nga ang aplikante masayod gyud sa proseso aron dili sila mogasto og dako gani kini mitataw ang ilang buhatan wala mapakyas sa pagtabang. (/IBM)(BANAT NEWS)