‘Red tide’ gipabantayan
CEBU, Philippines – Nipahimangno ang Department of Veterinary Medicine and Fisheries sa Dakbayan sa Sugbo labot sa red tide sa tanang klase sa kinhason sa Dakbayan sa Sugbo.
Kini human ang Bureau of Fisheries and Aquatic Resources nipahibawo nga adunay pipila ka bahin sa kadagatan sa Tagbilaran City, Masbate, Duis, Surigao del Sur ug Eastern Samar nga dunay red tide.
Si Dr. Alice Utlang, ang Cebu City Veterinarian, nipahibalo nga bisan pa man og wala pay narekord sa ilang buhatan nga kinhason nga dunay red tide, angayan nga magbantay gihapon ang mga konsumedor.
Gawas sa red tide, matud ni Utlang nga dunay higayon nga butangan og coloring ang kinhason ilabi na sa mga ambulant vendors diin wala masusi sa BFAR ang ilang baligya.
Giklaro ni Utlang nga kung dunay mga kinhason gikan sa nahisgutang mga lugar, dili kini dali nga makasulod sa Dakbayan sa Sugbo kung walay permit.
“Advise lang nako sa mga mamalitay, kung mamalit mo adto na lang gyud sa naay klaro nga pwesto kay kana sila nagbayad man sa City so na-record ug na-monitor gyud na sila og klaro,” matud ni Utlang. (/GMR)(BANAT NEWS)
- Latest
