80 ka balay itukod sa Balili property

CEBU, Philippines – Moabot sa 80 ka panimalay ang matukod sa Balili property sa Dakbayan sa Naga.

Kini ang gibutyag ni Mayor Kristine Vanessa Chiong. Matud ni Chiong nga pareho ang desinyo sa mga balay base sa desinyo sa National Housing Authority sa maong relocation site sa mga apektado sa pagdahili sa bukid sa barangay Tinaan.

Sumala pa ni Chiong nga ang budget nga ilang gamiton mao ang P25 milyones nga ila untang ibayad sa Kapitolyo alang sa pagpalit sa Balili property nga karon idonar na lang. Dugang pa ni Chiong nga ang dokumento na lang gikan sa Kapitolyo ang ilang gipaabot aron makasugod na ang NHA sa ilang katukuran sa mga balay.

Sa pagkakaron nagpadayon ang tagging sa dili mominus 350 ka panimalay nga anaa sa “ground zero” nga dili na gyud hingpit makabalik sa kanhi nila pinuy-anan.

Gipaabot usab karon ni Chiong ang opisyal nga listahan sa apektado nga maoy unang mahatagan sa relocation site.

Ang mayor nitug-an nga mosulod og 500 ka istruktura ang Balili property nga maoy himoon nilang permanent relocation site.  Ang 2.1 ektarya nga luna sa Balili property maoy ihatag sa Kapitolyo ngadto sa Dakbayan sa Naga aron himoon nga relocation site.

Si Gobernador Hilario Davide III uban si Bise Gob. Agnes Magpale ug pipila ka sakop sa Hunta Probinsiyal nisusi kini sa luna kagahapon. Matud sa gobernador nga kung magkulang ang luna sa karaang railway, andam ihatag sa Kapitolyo ang laing duha ka parcels sa luna sa Balili.

Dugang ni Davide nga walay problema ang maong mga luna sanglit titulado kini. Apan mopahibalo gihapon sila sa Ombudsman nga ilang idonar ang pipila ka parcels sa Balili property sanglit aduna pa kini kaso. (Le Phyllis F. Antojado/GMR)(BANAT NEWS)