Cebu papas sa SGLG sa DILG
CEBU, Philippines – Sa unang higayon sulod sa tulo ka tuig, wala naapil ang Probinsiya sa Sugbo sa mga gihatagan og Seal of Good Local Governance (SGLG) sa Department of Interior and Local Government (DILG).
Bisan pa niini, si Gobernador Hilario Davide III walay problema niini.
"That's alright, wala tay mabuhat, we tried," matud sa gobernador.
Wala pa hinoon masayud ang gobernador sa rason nganong wala maapil ang probinsiya sa mga awardees ug nagkanayon nga iya pang pangutan-on ang mga evaluators kun asa nagkulang ang probinsiya.
Sulod sa tulo ka tuig, ang Probinsiya sa Sugbo nakadawat sa maong pasidungog gikan sa DILG.
Karong tuiga walay probinsiya sa Central Visayas ang nakakuha sa maong award.
Sa 2018 SGLG Awardees, ang Lungsod sa Sogod ug San Remigio lang ang nakakuha sa maong award sa Sugbo.
Ang maong pasidungog ihatag kini sa DILG ngadto sa mga local government units nga maayo ang performance sa pipila ka areas sa ilang pagserbisyo.
Aron makuha ang maong award kinahanglang makapasar ang LGUs sa pipila ka "core areas" sama sa financial housekeeping, disaster preparedness, social protection and tourism, peace and order, ug culture and arts. (/GMR)(BANAT NEWS)
- Latest
