Presyo sa mga palaliton sa Naga gipugngan

CEBU, Philippines — Sugod kagahapon gipatuman sa Department of Trade and Industry ang “price freeze” sa mga nag-unang palaliton sa Siyudad sa Naga.

Matud ni DTI-7 Director Asteria Caberte nga kadtong masakpan nga molapas sa kamanduan pahamtangan og silot nga multa nga moabot sa usa ka milyon ka pesos o kaha pagkabilanggo og dili mominus usa ka tuig.

Gipasabot ni Caberte nga human madeklarar nga ubos sa state of calamity ang lugar, ipatuman dayon ang “price freeze” subay sa balaud.

Ang DTI-7 dunay team nga giumol aron mo-monitor sa presyo sa kamerkaduhan.

Mga basic necessities nga apil sa “price freeze” mao ang canned goods in tomato sauce, processed milk, sweetened condensed filled, powdered milk, kape, detergent o laundry soap, instant noodles ug bottled water.

Nunot sa trahedya, nagkadaiyang kalingawan alang sa ika-189 nga kapistahan sa Archdiocesan Shrine of St. Francis of Assisi sa siyudad ang kanselado.

Kagahapon gibuksan ang misa novena diin usa ka prosesyon ang gipahigayon ug kanselado ang LGU Night kagabii.

Matud ni Mayor Kristine Vanessa Chiong nga tanan nilang kusog ug oras ilang gamiton aron sa pagtubag sa tanang panginahanglanon sa evacuation center ug relocation site lakip ang paghatag og ayuda sa mga pamilya nga nahimutang kanhi sa ground zero.

Sumala pa ni Chiong nga gipahibalo na nila ang ilang mga partners sa mga kalingawan kinsa nisabot ra.

Ang parokya nga gipangulohan ni Fr. Orlando Ruiz VI ang nikanselar sab sa kalihukan sa Simbahan gawas sa misa novena nga sugdan sa alas 6 sa hapon hangtud sa kapistahan sa Oktubre  10 alas dies sa buntag nga mao ang concelebrated mass ug adunay prosesyon sa hapon.

Daghan sa mga residente ang nalipay nga walay mga kalihukan sa piyesta agi og pagyukbo ug paghatag nila og pakigsandurot sa mga pamilya nga nawagtangan og sakop sa banay.

Importante alang kanila ang misa ug novena aron malakip sa pag-ampo ang mga tawo nga nitaliwan na ilabi na sa biktima sa landslide.

Sa pikas bahin si Carcar City Mayor Nicepuro Apura motunol sa ilang hinabang sa Dakbayan sa Naga karong adlawa.

Matud ni Candice Acu?a, tigpamaba sa Carcar City, nga usa ka milyon ka pesos ang itunol nga hinabang. (BANAT NEWS)