CEBU, Philippines — Gilauman nga atol sa iyang State of the City Address (SOCA) karong adlaw'ng Biyernes ipahibawo ni Mayor Eduardo Gullas sa Siyudad sa Talisay ang kompletong lineup sa grupong Alayon alang sa sunod tuig nga eleksiyon.
Gawas niini, gilauman usab nga ipadayag ni Gullas ang iyang mga nahimong kalamboan sulod sa duha ka tuig nga paglingkod isip mayor sa Dakbayan sa Talisay.
Nasayran nga ang mga konsehal nga last termer gilangkuban nila ni konsehal Valeriano Ylanan ug si Richard Francis "Choy" Aznar.
Si Ylanan nipasulod sa iyang asawa nga si Ofelia samtang ang amahan usab ni Choy nga si Ricky Aznar ang iyang gidala sa grupo.
Ang magpapili pag-usab mao sila si Bise Mayor Alan Bucao ug mga konsehal nga sila si Gail Restauro, Socrates Fernandez, Julian "Teban" Daan, Rodulfo Cabigas, Antonio "Jojo" Bacaltos ug Manuel Cabriana samtang si Konsehal Arturo Bas dunay nitumaw nga mga huhungihong nga dili na kini magpapili sa sunod tuig nga eleksiyon. Si Konsehal Doroteo Emit gikatahong makig-atbang kini kang Bucao.
Si Kongresista Gerald Anthony "Samsam" Gullas maoy magpapiling mayor sa Dakbayan sa Talisay sa sunod tuig nga eleksiyon.
Sa laing bahin, si Atty. Edwin Cadungog, south district election officer nagkanayon nga niadtong buwan sa Hulyo hangtod sa Septiyembre 29 nga kataposang adlaw sa registration aduna silay natala nga 23,157 ka registered voters.
Base sa ilang record kaniadto adunay 360,421 registered voters sa south district atol sa nilabay nga Barangay ug Sangguniang Kabataan election. Samtang si north district election officer, Atty. Marchel Sarno nibutyag nga aduna silay natala nga 20,462 ka registered voters sukad niadtong buwan sa Hulyo niining tuiga. Nikabat ngadto sa 307,474 ang kasamtangang gidaghanon sa registered voters sa north district. (BANAT NEWS)