Awtoridad nangandam sa ‘Red October’
CEBU, Philippines — Nangandam ang Police Regional Office 7, Armed Forces of the Philippines-Central Command ug National Intelligence Coordinating Agency (NICA) sa hulga sa seguridad sa rehiyon.
Kini human sila nakadawat og intelligence report nga adunay mga bag-ong gradwar sa New People's Army sa Samar ug Leyte nga posibleng gamiton alang sa Red October.
Hisgutan sab atol sa tigum ang seguridad alang sa Association of Southeast Asian Nations (ASEAN) Ministerial Meeting sa usa ka hotel sa Dakbayan sa Lapu-Lapu karong Oktubre 15.
“There was a report nga nag-massive sila nang recruit, we are looking sa reports and compare it with our counterparts. Now I could not tell you further. What we are doing is we are coordinating with our counterparts, the AFP and NICA for the development ana,” matud ni PRO-7 director, Chief Supt. Debold Sinas.
Ang NICA usa ka ahensya sa gobiyerno nga maoy gitahasang mangalap ug mag-analisar og mga intelligence report sa Pilipinas.
Samtang gihatagan og katin-awan ni Sinas nga wala pa matumbok kun apil ba ang Rehiyon 7 sa hulga sa Red October hinungdan nga gipadayag niya nga walay angayan ikahadlok ang publiko.
Nasayran nga gipamasangil ni Presidente Rodrigo Duterte nga naghiusa ang Communist Party of the Philippines-New People’s Army ug ang oposisyon nga Liberal Party ug ang grupo sa Magdalo ni Senador Antonio Trillanes IV aron palagputon siya sa iyang pwesto diin gitakda unta niadtong Septiyembre 21.
Apan giingong wala gidayon sa maong grupo aron itumong sa buwan sa Oktubre kun kanus-a iselebrar sa tibuok kalibutan ang buwan sa komunista, Marxism ug Indigenous People (IP) ug gitawag kini nga Red October.
Sa pagkakaron wala una gisaka ang alert status sa kapolisan sa tibuok rehiyon samtang wala pa nagtigum kauban sa NICA.
Apan giseguro ni Sinas nga usa ka semana una pa ang ASEAN Meetings ilang isang-at ngadto sa red alert status ang kapolisan alang sa seguridad sa mga motambong nga mga delegado gikan sa nagkadaiyang bahin sa Southeast Asia. (BANAT NEWS)
- Latest
