15 ka nakalas sa landslide gilubong
CEBU, Philippines — Sa ikatulong hugna kinse ka mga biktimang namatay sa Naga landslide ang gilubong kahapon sa City of Naga Public Cemetery human sila nakompirmar sa ilang mga kabanay nga sila gyud ang maong mga nakalas.
Ang gilubong kagahapon mao sila si Bianca Versales, Michael Versales, Laureen Capoy, Theresa Shyne Capoy, Christopher Jhon Lagapa, Victoriano Abalo, Ma. Felipa Bacla-an, Felipe Dejillas Sr., Cheryl Pansoy, James, Kyle Pansoy, Chede Pansoy, Olivia Yapac Santillan, Siena Myveil Yapac, Edgardo Yapac Jr., and Vince Yapac Abanda.
Niadtong adlaw nga Lunes, ang unang batch sa gilubong miabot og 21 ka patay nga lawas ug niadtong Martes laing tulo usab ang gilubong. Duha sa mga gilubong kahapon ang mga anak ni Myrna Yapac. Siya ang inahan ni Siena ug Edgardo Jr. nga naapil sa natabunan. Mipadayag si Myrna sa mga reporter nga nanghinaot unta siya nga madungan og lubong ang iyang anak nga si Sheila nga sa pagkakaron wala pa nila makita ug gituohang usa kini sa mga patay’ng lawas nga naugkat na apan wala pa mailhi. Nanghinaot kini nga dili hunungon ang search and retrieval operations.
Sa misa sa patay sa Archdiocesan Shrine of St. Francis of Assisi, gipahimug-atan ni Rev. Fr. Mario Atienza ngadto sa mga nawad-an og minahal sa kinabuhi nga hinay-hinay nga dawaton ang nahitabo kay kini unang lakang sa pagpadayon sa pagpakabuhi.
Samtang si Rev. Fr. Pacifico Nohara Jr. miingon nga dili mawad-an og pagsalig sa Ginoo ang mga tawo karon panahona.
Gidala ang imahen sa Balaang Bata gikan sa Basilica Minore del Sto. Niño de Cebu aron makahatag og kadasig sa mga evacuees. Nanghatag usab sila og hygiene kits ngadto sa 417 ka pamilya.
Base sa uwahing talaan sa command center sa Naga miabot na og 77 ang kompirmadong patay, 16 usab ang parte sa mga lawas nga naugkat ug wala pa mailhi kon kinsa o kang kinsa, walo ang missing, ug 18 ang naangol. (BANAT NEWS)
- Latest
