CEBU, Philippines — Ang last termer nga si Bokal Sun Shimura sa ikaupat nga distrito sa Probinsiya sa Sugbo mao ang modagan isip mayor sa Lungsod sa Daanbantayan sa umaabot nga midterm election sa tuig 2019.
Si Shimura nibutyag nga nidesisyon ang ilang pamilya nga mopahulay una sa politika ang iyang stepfather nga si Daanbantayan Mayor Vicente Loot nunot kini sa kontrobersiya nga giatubang sa mayor diin gilambigit kini ni Presidente Rodrigo Duterte sa ilegal nga drugas.
Matud ni Shimura nga gisukna siya sa iyang stepfather kong iyaha bang mapadayon ang mga nahimo niini karon sa lungsod.
Gibutyag ni Shimura nga lakip sa buot kawhaton sa iyang step father nga sulod sa 10 katuig mahimo nang siyudad ang Daanbantayan.
Kabahin sa isyu sa ginadiling drugas, si Shimura nagkanayon nga kampante siya nga dili siya masama sa iyang stepfather kinsa gilambigit ni Duterte sa ginadiling drugas ug wala siya’y nakitang mga isyu tali kaniya ug sa presidente.
Nunot niini, si Shimura nahimo kining mayor sa Daanbantayan niadtong tuig 2007 ngadto sa 2010 una pa kini napiling provincial board niadtong tuig 2010.
Gibutyag ni Shimura nga ang gipili sa ilang partido nga mahimo niyang bise mayor sa umaabot nga election mao ang kasamtangang konsehal sa lungsod nga si Bridget Tangcawan nga usa usab ka last termer.
Ang asawa ni Shimura nga si Kerrie Shimura ang giplanohan sa ilang grupo nga modagan isip bokal sa sunod tuig nga eleksiyon. – BDB (BANATNEWS)