Maestra, kabit nasakpan sa lodge
CEBU, Philippines – Gipangdakop ang 36-anyos nga maestra ug 35-anyos niya nga kabit human naaktohi nga naghilawas sulod sa usa ka lodge sa Poblacion, Lungsod sa San Remigio niadtong Martes sa alas 11:25 sa gabii.
Nidangop sa San Remigio Police Station ang 39-anyos nga bana sa maestra ug nagpatabang nga madakpan ang iyang asawa kinsa dugay na nga nagluib kaniya.
Giingong pulos sila taga Dakbayan sa Bogo ug niadto lang sila sa San Remigio aron masolo ang usa’g-usa.
Dihang gironda sa mga polis ang lodge, nakig-alayon ra sab ang tagdumala niini ug naablihan gyud ang lawak.
Naabtan pa nga hubo ang duha ug dali nga nitago ug nang-locked sa pansayan sa lawak.
Apan nagmalampuson ang mga awtoridad sa pagdakop sa duha ug gitanggong sa prisohan sa San Remigio Police Station.
Kasong concubinage ug adultery ang atubangon sa duha ug hayan matangtangan sa lisensya ang maestra. (/GMR)(BANAT NEWS)
- Latest
