Pagtabang ipaagi sa asosasyon

CEBU, Philippines — Gitagsatagsa sa Division for the Welfare of the Urban Poor (DWUP) ang mga nagkalain-laing problema sa dili momenus 5,000 ka mga benepisyaryo sa 93-1 land swap deal aron mas mapasayon ug paspas ang opisyal nga paghatag na kanila sa maong mga luna.

Ang probinsiya ug siyudad sa Sugbo miselyo sa pagbinayloay sa ilang mga luna niadtong Agosto 3 ning tuiga. Kining maong mga luna naa mahimutang sa Barangay Kamputhaw, Capitol Site, Kalunasan, Busay, Luz, Lahug, Mabolo, Apas, Lorega, San Miguel, Kasambagan, ug Tejero.

Nagkanayon ang Operations Head sa DWUP Genevieve Alcoseba nga ilang gikonsulta ang mga benepisyaryo alang niini makaumol og baseline sa opisyal nga pag-transfer sa luna.  Human sa signing sa Deed of Donation and Acceptance ni-proceed na sila sa konsultasyon. Sa 46 ka homeowners associations, 26 niini ang nakonsulta na sa DWUP aron makita unsay tinud-anay nga sitwasyon sa ground.  Dugang niini, sa 26 nga nakonsulta nga grupo ang DWUP nakapahigayon og tagging sa 16 ka asosasyon.  Pasabot sa tagging mao ang pagsubay sa matag problema sa matag benepisyaryo aron sila matabangan pinaagi sa asosasyon. Matud niya, lisod silang tabangan kon wala masayod ang DWUP sa problema. Nasayran nga apil sa mga nitumaw ang problema mao nga adunay luna lima ka buok ang nag-ilog, samtang ang uban wala masubay sa subdivision plan ang luna nga gitarokan sa ilang balay.

Si Alcoseba miingon nga dili sila pabor sa sugyot ni Konsehal Jose Daluz III nga tagsa-tagsahon ang pakig-estorya sa mga benepisyaryo imbes nga pinaagi sa asosasyon. Matud niya ang asosasyon magsilbi nga outlet sa City Government aron didto ipaabot ang mga impormasyon labot sa paghatag sa luna.  Matud ni Alcoseba kon tagsatagsahon masamok gyud kini kay adunay mga benepisyaryong makigtigi gyud sa uban.

Karong Oktubre tinguhang mahuman ang konsultasyon ug imbitahon ang mga konsehal pagtambong sa Local Housing Board meeting sa unang semana sa maong bulan. Ang guidelines moagi kang Mayor Tomas Osmeña ug paaprubahan usab sa konseho. (BANAT NEWS)