CEBU, Philippines — Usa ka 14-anyos naangol human giunay og dunggab sa iyang 50- anyos nga uyoan kinsa nagdunggab usab sa kaugalingon human sa krimen niadtong Huwebes sa udto diha sa Sitio Hikapon, Barangay General Climaco, Dakbayan sa Toledo.
Base sa nakalap nga impormasyon sa imbestigador sa Toledo City Police Station nga si Senior Police Officer 3 Thule Tahadlangit, hubog nga mipauli ang suspetsado nga si Daniel Cañaliso, nga ulitawong guwang gikan mitambong sa kasal sa ilang paryente.
Matud pa nga mihapit kini sa balay sa biktima ug giingong kalit lang niya kining gidunggab kausa sa dughan ginamit ang usa ka kitchen knife.
Swerteng nakadungog ang inahan sa bata nga igsuon sa suspek ug napugngan kini nga usban pagdunggab ang bata.
Ang bata nakahigayon sa pagdagan gawas sa balay ug nangayo og tabang sa mga silingan.
Matud pa nga pag-abot sa mga tawo sa gikahimutangan sa suspek ug nakugang na lang sila nga nagkadugo na kini ug nayagyag ang ginhawaan.
Daling gidala ang duha sa Toledo District Hospital apan gibalhin sa usa ka tambalanan sa Dakbayan sa Sugbo ang suspek. Ang bata gikatahong luwas na sa makuyaw nga kahimtang samtang ang suspek talandugon.
Si Tahadlangit miingon nga nasuko ang suspetsado sa manag-inahan kay wala kini mopatuo kaniya nga dili motambong sa maong kasal nga iyang giadtoan.
Wala usab mahibaw-i kon nganong dili gusto sa suspek nga makatambong ang duha nga ilaha raman untang kadugo ang gikasal. (/IBM)(BANATNEWS)