Poste nga kahoy ipatangtang
CEBU, Philippines – Mipasar og balaudnon sa konseho sa Dakbayan sa Sugbo si Konsehal Jerry Guardo aron ipatangtang ang tanang poste nga ginama sa kahoy sa tibuok siyudad kay aduna kini hulga sa seguridad sa katawhan.
Nasayran sa lokal nga kagamhanan nga adunay daghang karaan nga mga poste sa dakbayan diin kasagaran niini, nagbahirig na ug ang wire na lang ang nagpugong human gipangaon sa anay ug nangalata na.
Dungan sa pagpasar sa maong balaudnon, mihatag si Guardo og bag-ong desinyo sa poste nga angayang sundon sa mga TelCo ug utility companies. Giingong gihangop usab kini sa mga naasoy nga kompaniya.
Sa bag-ong desinyo, kinahanglan na nga ang tanang mga poste, 20 feet ang gitas-on. Adunay gigahin nga linya alang sa TelCos diin ang VECO ang naa sa primary ug secondary line samtang sa third line ang ubang utility companies.
“We have this design which ang mga linya horizontal cross arm in one post. So, ang mga taga PLDT o GLOBE naa na silay assigned nga linya” dugang pa ni Guardo.
Lakip sab sa ordinansa mao ang pagpatukod og vertical limiter sa mga highly critical ug strategic areas diin lakip niini ang padayong pagpanangtang sa spaghetti wires o mga bubod nga wires nga makit-an sa kadalanan.
Dugang ni Guardo nga kon mosuroy ka sa kadalanan sa dakbayan, halos napuno na gyud kini og tangled wires nga hugaw tan-awon.
Anaa na sa ikaduha nga bulan ang programa sa konsehal nga “Spaghetti Wires Eradication Program” diin ubay-ubay nang natangtang nga mga bubod nga electrical wires gikan sa dalan P. Del Rosario paingon sa Gen. Maxilom Avenue (Mango Avenue).
Nagpadayon ang clearing operation sa naasoy nga mga wire sa major roads sa siyudad ug kon mahuman na, ipadayon kini sa barangay level. (/DILT)(BANAT NEWS)
- Latest
