CEBU, Philippines — Nanumpa isip bag-ong konsehal sa Lungsod sa San Remigio si Joyce Olivar atubangan ni Gobernador Hilario Davide III kagahapon sa buntag.
Si Joyce Olivar ang nihulip sa gibiyaan nga pwesto sa iyang amahan nga si konsehal ug kanhi mayor Pablito “Pabling” Olivar kinsa namatay niadtong Hulyo sa sakit sa kasingkasing.
Si Joyce gikuyogan ni Kongresista Benhur Salimbangon sa ikaupat nga distrito sa Lalawigan sa Sugbo kinsa kaalyado sa politika sa mga Olivar ubos sa National Unity Party.
Matud ni Joyce nga iyang ipadayun ang gisugdan sa iyang amahan bisan unang higayon pa niya nga nisulod sa panerbisyo sa gobiyerno.
“We’re not making any plans yet but I have to continue what’s his legacy,” dugang ni Joyce.
Si Joyce usa ka nurse ug siya ang nagdumala sa negosyo sa ilang pamilya.
Ang iyang amahan nga si Pabling nahimong mayor sa lungsod sulod sa tulo ka termino ug gipulihan sa anak nga si kanhi mayor Jay Olivar. Nova Jane A. Yanson (BANAT NEWS)