CEBU, Philippines — Gitinguha karon ni Mandaue City Mayor Gabriel Luis “Luigi” Quisumbing ang pagsusi sa mga luna nga gipanag-iya sa kagamhanan sa dakbayan.
Kini tungod kay daku kining kapuslanan alang sa ipatuman nga mga proyekto nga naglakip na sa housing program sa kagamhanan.
Nunot niining mao niyang tinguha iyang gitahasan si City Treasurer, Atty. Regal Oliva, sa pagsusi sa kasamtangang kahimtang sa mga lease contracts sa mga luna nga gipanag-iya sa kagamhanan sa maong dakbayan.
Gilakip sa mayor sa paghimo og pakisusi mao kadtong mga luna nga nabaligya na apan nagpabilin pa gihapong bakante hangtud karon tungod kay wala gihapon magamit sa nakapalit niini.
Sa nasayran nga sa mokabat P1 bilyon nga kantidad nga gigahin alang sa housing project sa dakbayan maoy gilauman nga ang P220 milyones lang nga kantidad ang magahin sa National Housing Authority (NHA) alang sa pagtukod sa low-rise socialized housing project sa Barangay Looc sa dakbayan. Matud ni Quisumbing nga daku unta nga kahigayunan ang paggamit sa maong gahin alang sa paghatag og ilang kaugalingong panimalay nga kapuy-an ang gatusan ka molupyo sa dakbayan kon may luna pa sa yuta nga kapahimutangan niini.
Gitataw ni Quisumbing nga gumikan niining maong suliran maoy gitinguha niining mga panahona nga maimbentaryo ang mga luna nga gipanag-iya sa kagamhanan alang sa pagsuta sa kahimtang sa pamasin nga magsilbi kining kapahimutangan sa gitinguha nga socialized housing sa kagamhanan. (BANAT NEWS)