Hulga sa pagpamomba sa mall di tinuod

CEBU, Philippines —  Giklaro sa Police Regional Office-7 nga base sa ilang intelligence report, walay kamatuoran ang nikatap nga bomb threat sa Probinsiya sa Bohol ug sa Dakbayan sa Sugbo.

Sumala sa tigpamaba sa PRO-7, Supt. Reyman Tolentin, nga base sa pag-validate sa Regional Intelligence Division, mugna lang kini sa mga tawo nga buot manghadlok sa publiko.

Dugang pa niya nga aduna sab silay nadawat nga impormasyon nga kompetensiya sa mga mall ang motibo sa maong pagpakatap og peke nga impormasyon pinaagi sa text message ug sa social media.

“Seguro away-away sa mall establishments para di moadto or ma-discourage moadto og malls. So mao nay nitumaw, so it was fake news,” matud ni Tolentin.

Nikatap ang pahimangno nga dili molarga sa duha ka bahin sa Probinsiya sa Bohol sanglit adunay mga terorista nga mangidnap aron gamiton sa pagpabaylo sa ilang mga kauban nga nadakpan sa tropa sa gobiyerno.

Gibutyag ni Tolentin nga aduna na silay listahan sa mga personalidad nga nagpaluyo sa pagpanghulga apan ila una kini gipugngan ang pagpagawas sa publiko aron dili mabulilyaso ang ilang operasyon.

“So makaingon gyud ta nga safe ang Central Visayas pagkakaron kay  base sa atong intelligence reports, dili tinuod ang maong impormasyon,” dugang ni Tolentin.

Samtang gihangyo ni Konsehal Dave Tumulak, chairman sa committee on public order and safety ug deputy mayor for police matters, ang katawhan nga dili angay malisang sanglit peke ang maong taho.

Gani gipahugtan ang seguridad sa coastal barangays diin kun dunay makit-an nga katingad-an mo-report dayon sila sa mga tinugyanan sa balaud.

Ang konsehal mismo nakadawat sab sa maong report ug gihulagway niya nga nakamugna kini og kahadlok sa katawhan.

Giawhag niya ang publiko nga mo-report kun dunay mamatikdan nga katingad-an o kaha kadudahan sa ilang palibot. (Decemay P. Padilla/GMR) (BANATNEWS)