2 kawani sa Mandaue ipabalik sa orihinal nga buhatan
CEBU, Philippines – Ang Civil Service Commission (CSC) Regional Office nimando kang Mandaue City Mayor Gabriel Luis Quisumbing sa pagpabalik diha sa ilang buhatan sa duha ka kawani nga iyang gibalhin ngadto sa Umapad Dumpsite Task Force.
Ubos sa kasamtangang Civil Service Laws and Rules, si Quisumbing gimanduan nga ipahunong ang implementasyon sa Mayo 28, 2018 memorandum ug ibalik sila si Andres Suson diha sa buhatan niini sa city engineering aron makahimo kini sa iyang trabaho isip assistant city engineer sa siyudad ug Damaso Tumulak diha sa orihinal nga buhatan niini sa Human Resource Management Office.
Si Quisumbing gimanduan usab nga mosumitir og certified true copies sa mga record kalabutan sa reassignment sa nahisgutang duha ka kawani sa siyudad lakip sa iyang comment to the instant appeal sulod sa 10 ka adlaw gikan sa pagdawat niya sa maong kamanduan.
“Non-compliance shall be deemed a waiver and instant case shall be resolved based on available record”, tipik sa resolusyon ni Editha Lugano, director sa CSC.
Nasayran nga nidangop sila si Suson ug Tumulak ngadto sa CSC human sila gibalhin ni Quisumbing sa Umapad Dumpsite Task Force.
Matud sa maong mga kawani nga ang maong memorandum batok kanila dili makiangayon ug nakalapas kini sa “2017 Omnibus Rules on Appointments and Other Human Resource Actions”. (/BDB)(BANAT NEWS)
- Latest
