Kontrabando nasakmit atol sa greyhound sa TCJ
CEBU, Philippines – Mga kontrabando lakip na niini ang ilegal nga drugas ang nasakmit atol sa gipahigayong greyhound operation niadtong Martes sa buntag sa mga sakop sa Bureau of Jail Management and Penology (BJMP)-7 diha sa Talisay City Jail.
Matud ni Chief Inspector Mary Jane Inopia nga simultaneous ang ilang gibuhat nga greyhound operation.
Nasakmit nga kontrabando naglangkub sa usa ka medium ug 18 ka gagmay nga pakete sa shabu, usa ka cellphone, filter sa sigarilyo, lumboy ug uban pa.
Matud ni Inopia nga diha sa cottage B nasakmit ang maong mga kontrabando ug walay bisan usa nga piniriso ang niangkon niini..
Si Inopia nipadayag sa iyang kasagmuyo tungod kay bisan unsa nila kahugot sa ilang pagpatuman sa balaod sa prisohan duna gihapoy makalusot nga mga kontrabando.
Sa laing bahin, lima ka lalaki ang nasikop atol sa gipahigayong “Oplan Limpiyo” sa kapolisan sa Dakbayan sa Danao niadtong Martes sa gabii diha sa Barangay Canlingo Maslog, Suba ug Cogon Guinsay.
Ang mga nasikop giila nga sila si Reymart Yap, Janet Yap, Lyndon Sampan, Nanet Yap ug Vincent Bentoy.
Nasakmit gikan sa mga suspetsado ang pinutos sa drugas nga mobalor ngadto sa P10 mil halin nga mokabat ngadto sa P1,400. Nangulo sa maong operasyon si Police Superintendent Jaime Quiocho, hepe sa Danao Police Station uban sa pakig-alayon sa mga operatiba sa Philippine Drug Enforcement Agency (PDEA)-7.(Rowena D. Capistrano/BDB)(BANAT NEWS)
- Latest
