Pamahayag ni Duterte pahimatngon sa ‘adik’ nga polis

CEBU, Philippines – Wala natandog ang kapolisan sa Dakbayan sa Talisay sa pamahayag ni Presidente Rodrigo Duterte nga adunay daghang drugas ug mga adik nga polis sa dakbayan.

Matud ni Supt. Marlu Conag, hepe sa Talisay City Police Station, nga wala sila nasagmuyo sa pamahayag ug gidawat nila kini nga pahinumdum nga mohimo pa sa ilang trabaho.

Sumala pa ni Conag nga daghan na sila nadakpan nga mga tawo nga nalambigit sa ginadili nga drugas ug kanunay sab sila nagpa-drug test diin walay nagpositibo.

Dugang pa ni Conag nga 22 ka barangay ang dakbayan ug dili ikalimod nga katunga niini ang problema sa ginadiling drugas hinungdan nga padayon ug subsob ang ilang operasyon.

Mahinangpon siya nga adunay mga sakop sa Regional Mobile Force Batallion ang naka-standby karon sa Barangay Tangke nga nakasikop sab og mga tawo nga nalambigit sa ilegal nga drugas.

Kadaghanan sa mga tawo nga nasikop dili gikan sa dakbayan kung dili sa mga silingan nga lugar nga anha ra mopalit.

Si Police Inspector Clifton Gairanod, team leader sa Force Base Platoon, nitug-an nga dul-an sa duha pa ka semana sila sa lugar apan dul-an sa 60 na ang ilang nasikop.

Ang direktor sa Police Regional Office-7, Chief Supt. Debold Sinas, nitug-an nga ang pagpresentar sa kalampusan sa Talisay City Police Station dili tungod sa pamahayag ni Duterte kung dili naka-schedule na kini.

Gitug-an ni Sinas nga padayon silang nihimo og internal cleansing ug drug test sa kapolisan lakip ang paghimo unya og imbestigasyon sa giingon ni Duterte nga may mga polis nga adik.

Alang kang Gobernador Hilario Davide III, usa ka pahimangno sa kapolisan ang paghulagway ni Duterte nga adik ang mga polis sa Sugbo.

Matud ni Davide nga dunay mga but-an nga polis apan adunay ubang nagbinuang ug wala magtarung sa trabaho.

Dugang ni Davide nga maayo sab nga magmatngon ang kapolisan ug si Duterte nasayud sa mga polis nga badlungon.

Kalabot sa giingong shabu laboratory sa Sugbo, si Davide nagkanayon nga usa kini ka hagit sa kapolisan ang pagpangita kun asa gikan ang supply sa ilegal nga drugas.

Si Cebu City Mayor Tomas Osmeña sa iyang bahin niingon nga sa gobiyerno anaa ang nindot ug bati.

Sayop sab ang pagtuo sa uban nga ang institution usa lang ka tawo.

Giangkon ni Osmeña nga ang mga badlungon nga mga law enforcers makaapekto sa pagsalig sa mga tawo ngadto kanila.

“It is affecting, of course it’s affecting, it’s always affecting. That’s normal, that’s why my theme is not to change everything because it cannot be done. So that’s why I say we just have to keep working and keep producing it so that tomorrow will be better than today,” matud ni Osmeña.

Nikomento sab ang mayor sa pamahayag ni Cebu City Police Office director, Senior Supt. Royina Garma, nga posible nga dunay shabu laboratory sa Sugbo.

“Maybe, I don’t know. Drugs are everywhere. There’s plenty of drugs everywhere. Plenty of drugs in Bohol also,” matud ni Osmeña. (Le Phyllis F. Antojado ug Decemay P. Padilla/GMR)(BANAT NEWS)