CEBU, Philippines – Gidakop ang duha ka armadong lalaki kinsa giingong mga hitman ug gituohang nag-atang sa ilang patyonon sa Upper Torre, Inayawan, Dakbayan sa Sugbo niadtong Martes sa gabii.
Giila sa kapolisan ang duha ka dinakpan nga sila si Tommy Oyanguren, 22, ug Mamerto Rollo, 39, pulos molupyo sa maong lugar.
Ang direktor sa Cebu City Police Office nga si Senior Supt. Royina Garma nagkanayon nga namatikdan sa mga nag-roving nga mga polis sa Police Station 7 ang duha nga nagbarug-barug.
Ang duha pakyas sa pagpakita og dokumento sa pagdala og armas ug didto sa presinto giingong nabasahan ug nakita sa ilang cellphone nga aduna silay target nga patyon nga moagi sa maong lugar. Gihimakak hinoon kini sa duha.
Nangangkong mga asset sa Criminal Investigation and Detection Group 7 ang duha ug giingong adunay nagpaluyo kanila nga polis.
Apan gihimakak kini sa bag-ong hepe sa CIDG-7, Supt. Lito Patay.
“During my time I didn’t allow it,” matud ni Garma kinsa maoy gipulihan ni Patay sa CIDG-7.
Hinoon nasubay sa kapolisan nga dugay na nga gipalagpot gawas sa Sugbo ang gihisgutang opisyal kinsang pangan gipugngan ni Garma ingon man ang biktimahon unta sa duha samtang nagdagan pa ang imbestigasyon.
Ipaubos sa ballistic examination ang nakuha nga kalibre .45 nga armas kang Oyanguren ug ang usa ka Smith and Wesson revolver ni Rollo aron masubay kun nagamit na ba kini sa pipila ka pagpamatay sa Dakbayan sa Sugbo.
“So you see, if these two guys were not apprehended, definitely naa gyuy mamatay gabii and kung mag-imbestigar na pud ta didto sa namatay basin og naay drug problem or issue basin mogawas na pud nga ang nipatay ingon na pud nila polis,” matud pa ni Garma.
Apan gitapok ni Cebu City Mayor Tomas Osmeña ang mga impormasyon nga iyang nakuha labot sa giingong mga hitmen nga gikan sa Negros Oriental.
Sa niaging adlaw gipublikar sa mayor ang listahan sa mga giingong hitmen diin sa lima niini sakop sa Philippine National Police samtang upat ang sibilyan.
“They are there in PC Hills, that’s the information I get. I have pictures allegedly some of them,” sigun ni Osmeña.
Ang kapolisan sa ilang bahin dili motuo labot sa listahan sa mayor nga “Negros Boys” kay gawas nga wala’y validation, wala sab kini igong basehanan. (Decemay P. Padilla/GMR)(BANAT NEWS)