CEBU, Philippines — Ang Philippine State College of Aeronautics (PhilSCA) ug ang Cebu Technological University (CTU) nagkahiusa sa pagpalapad sa programa sa aeronautics diin ang maong mga institution nigama kini og memorandum of agreement (MOA) niadtong Biyernes alang sa pormal nga pagmugna sa consortium.
Si Marwin dela Cruz, presidente sa PhilSCA, Rosein Ancheta, presidente sa CTU ug Kongresista Benhur Salimbangon sa ikaupat nga distrito sa Probinsiya sa Sugbo ang nagpirmahanay sa maong MOA. Ang karaan nga airstrip sa Barangay Caputatan Sur, Lungsod sa Medellin ang nakita nga host sa programa sa aeronautics isip pagpalapad sa kasamtangan nga programa sa PhilSCA diha sa Mactan.
Ang campus sa Medellin sa dili madugay maghatag kini sa Aviation Tourism Program ug Aircraft Maintenance Technology Program.
Si Salimbangon nibutyag nga ang Department of Transportation Secretary, Arthur Tugade nipasalig kaniya sa pundo alang sa pagpalambo sa runway nga magamit sa tunghaan lakip usab sa mga commercial aircraft. Dugang ni Salimbangon nga ang magtiayong Carlos ug Mariquita Salimbangon-Yeung nidonar sa lote diin magtukod sa school building. Si Mariquita kinsa usa ka pilantropo igsuon kini ug si Kongresista Salimbangon. - Nova Jane A. Yanson (BANAT NEWS)