Prisohan sa dakbayan sa Talisay naghuot na
CEBU, Philippines — Nabalaka ang kapolisan sa Dakbayan sa Talisay nga dili na makaginhawa ang mga binilanggo sa ilang detention cell gumikan sa kadaghan na.
Si Supt. Marlu Conag, hepe sa kapolisan sa siyudad, niingon nga niabot na sa 61 ka binilanggo ang naa nila diin ang prisohan maigo lang og 20 ka tawo.
Matud ni Conag nga ni-report kaniya ang mga jailers ug nipadayag sa ilang kabalaka nga maglisud na og ginhawa ang mga binilanggo lakip na sab sila kay nagsagol na man ang baho sa tawo.
Ang binilanggo nga dili magpaila niingon nga maglisud gyud sila og katulog tungod sa ilang gidaghanon.
“Magsabot na lang mi nga puli-puli mi og katulog kay lisud man gyud kaayo among kahimtang,” matud sa binilanggo.
Si Conag nagkanayon nga maghuot gyud ang binilanggo ilabi na kun taas ang adlaw nga walay trabaho kay dili pa man mapasakaan og kaso ug mabalhin sa Talisay City Jail.
Siya nitataw nga wala silay mahimo kun dili ang pagbuhat lang sa ilang trabaho sa pagdakop sa mga tawo nga ilegalista bisan sa kahuot na sa prisohan.
Asoy pa ni Conag nga ang mga binilanggo nihangyo nga mogawas na sila sa prisohan ug nisaad nga dili na mobuhat og kalapasan apan wala siyay mahimo kun dili ang pagpasaka og kaso. (BANAT NEWS)
- Latest
