CEBU, Philippines – Gikombikto sa kasong kriminal ang anak ni anhing bise gobernador Gregorio Sanchez Jr. nga si Leodegreco “Greco” Sanchez kinsa gipahamtangan sa korte og 12 ka tuig nga pagkapriso ug P300 mil nga multa.
Kini may kalabutan sa kaso sa ilegal nga drugas kauban sa usa ka Edward Tevez kinsa gidakop niadtong Abril 2013 sa usa ka panimalay sa Mabolo, Dakbayan sa Sugbo.
Atol sa pagsikop sa kapolisan, sila si Sanchez ug Tevez nakuhaan og 4.35 gramos nga shabu ug mga drug paraphernalia.
Si Regional Trial Court Judge Mory Nueva sa Branch 13 sa Dakbayan sa Sugbo ang nipakanaug sa hukom niadtong Hulyo 17, 2018.
Ang igsuon ni Greco nga si kanhi bokal Grecilda Sanchez nasubo sa gidangatan ni Greco.
"I am sad but he is now held responsible for all his misconduct in the past. No one is above the law," matud ni Sanchez.
Si Greco kasamtangang napriso karon sa Cebu Provincial Detention and Rehabilitation Center (CPDRC) tungod sa laing kaso sa ilegal nga drugas ug paghupot og ilegal nga mga armas.
Siya gidakop pinaagi sa search warrant nga giluwatan sa RTC sa Dakbayan sa Talisay diin nakuhaan si Greco og armas ug drug paraphernalia sa iyang panimalay sa Lungsod sa Tuburan niadtong Hulyo 2017. (/GMR)(BANAT NEWS)