Right-of-way sa nasunogan palapdan

CEBU, Philippines – Mo-establisar og road-right-of-way ang lokal nga kagamhanan sa mga 93-1 lots nga nasunogan niadtong Sabado sa Barangay Kamputhaw, Siyudad sa Sugbo.

Adunay 107 ka panimalay nga naugdaw ang nahimutang sa 93-1 lots maong plano karon sa kagamhanan nga i-reblocking aron madali ang pag-agi sa mga responders kung duna emerhensiya sama sa sunog.

Base sa obserbasyon sa kagamhanan, ang agianan sa Purok Lower 3, Sitio Lupa, Kamputhaw nga naigo sa sunog igo ra nga maagian sa mga tawo.

Sa reblocking, himoon kining lima ngadto sa unom ka metros ang kuhaon alang sa road-right-of-way diin igo na nga maagian sa Quick Response Team ug mga sakyanan sama sa ambulansya ug fire trucks.

Si Genevive Alcoseba, operations chief sa Division for the Welfare of the Urban Poor (DWUP), niingon nga sa pag-reblock, ang mga tag-iya sa balay dili na magdahum nga mabalik pa ang sukod sa ilang kanhi luna sa wala pa ang sunog kay dunay ihatag nga partikular nga gilapdon matag panimalay nga ma-uniporme sa tanang biktima sa sunog. “So ayaw na lang gyud pag-expect nga mahatag imong original nga sukod kay imong original nga sukod, sa time man to nga walay karsada. So ayaw pag-expect kay ma-decrease gyud na ang sukod nga i-grant sa gobiyerno,” matud ni Alcoseba.

Hinoon nisaad ang lokal nga kagamhanan ug ang DWUP nga paminawon ang mga sugyot sa katawhan una nila ipatuman ang re-blocking aron mahibalo sila sa posibleng reaksyon sa mga tawo kay ang 93-1 lots nga nasunogan gipanag-iya sa gobiyerno.

Sa pagkakaron, padayon pa gihapon ang pagproseso sa financial assistance ug housing materials sa mga nasunogan. (/GMR) (BANAT NEWS)