Santo Papa hayan moanhi sa sugbo sa 2021

CEBU, Philippines – Imbitahon si Pope Francis sa umaabot nga kasaulogan sa ika-500 ka tuig sa Kristiyanismo sa Pilipinas sa tuig 2021.

Kini ang gitug-an ni Rene Escalante, chairman sa National Historical Commission of the Philippines, kinsa niingon nga duha ka grupo ang moimbitar sa Santo Papa. Kini mao ang Department of Foreign Affairs sa habig sa nasudnong kagamhanan ug ang Catholic Bishops Conference of the Philippines sa habig sa simbahan.

Sumala pa ni Escalante nga nipagawas na og executive order si Presidente Rodrigo Duterte alang sa umaabot nga dakung kalihukan hinungdan nga karon aduna nay gimugna nga preparatory committee alang sa comprehensive plan nga iduso nila karong tuiga.

Dugang ni Escalante nga kung maaprobahan ang ilang plano, makapangayo dayon sila og budget sa umaabot nga dakung kalihukan. Gilauman nga ang Santo Papa ang mangulo sa ika-lima ka gatus na ka tuig sa Kristiyanismo sa Pilipinas.

Daghang kalihukan nga giandam alang sa dakung selebrasyon nga buhaton sa Leyte ug Sugbo diin ang unang bunyag ipahigayon.

Sa pagkakaron gitug-an ni Escalante nga atol sa ilang tigum ni Gobernador Hilario Davide III, hugot ang suporta nga ihatag niini sa umaabot nga dakung kalihukan. (/GMR)(BANAT NEWS)