Gica balik mayor na sa Dumanjug

CEBU, Philippines – Hingpit na nga nakalingkod pagbalik sa katungdanan si Dumanjug Mayor Efren “Gungun” Gica human nga gibaligtad sa Court of Appeals (CA) ang desisyon sa Ombudsman.

Ang Ombudsman ni-dismiss kang Gica human namatud-an nga sad-an sa kasong serious dishonesty ug grave misconduct sa giingong pag-usab sa liquidation report.

Gikalipay ni Gica ang paghibalik niya sa pwesto kagahapon human sa pagpalagpot kaniya niadtong Nobiyembre 2017.

Unang gihimo ni Gica ang pagsuwat sa Sangguniang Bayan kalabot sa iyang pagbalik isip mayor diin iya sab gihatagan og kopya ang Department of Interior and Local Government (DILG), Gobernador Hilario Davide III ug Bise Gobernador Agnes Magpale.

Nagsugod ang kaso sa gipasaka nga reklamo sa iyang kaatbang sa politika nga si kanhi mayor Nelson Garcia kinsa namasangil nga gipaburot ni Gica ang kantidad sa resibo sa usa ka restaurant gikan sa P10 mil ngadto sa P21 mil.

Samtang ang DILG-7 dili pa makahatag og komento sa paglingkod na ni Gica sa katungdanan.

Matud ni Atty. Ian Kenneth Lucero, DILG-7 legal officer ug pangulo sa Local Government Monitoring and Evaluation Division, nga wala pa silay dokumento nga gikuptan gikan sa ilang ulohan nga buhatan ug wala pa sab sila makakita sa desisyon.

Dugang ni Lucero nga magpaabot pa sila kung aduna silay mando aron ilang makita kung unsay ilang partisipasyon ug kung kinsa ang mopatuman niini.

Giklaro ni Lucero nga gikan sa Secretary sa DILG ang kamanduan nga iduso sa ilang rehiyonal nga buhatan.

Susama usab ang giluwatan nga pamahayag sa OIC-regional director sa DILG-7, Maria Loisella Lucino, nga wala pa usab siya kadawat ug nakabasa sa order may kalabutan sa paglingkod og balik ni Gica. (Le Phyllis F. Antojado ug Rowena D. Capistrano/GMR)

Kalihukan sa Mandaue Charter Day gilusad

Hingpit na nga gilusad kagahapon ang mga kalihukan sa pagsaulog sa ika-49 ka tuig nga kasumaran sa Charter Day sa Dakbayan sa Mandaue karong Agosto 30. Kini sugdan sa Inter-Department Sports Activities nga buksan karong Agosto 10 ingon man ang Dance Palabas sa public library.

Adunay himoon nga Disaster Preparedness Seminar Basic Life Support Course sa Agosto 15, Cebu Digital Marketing Competition, ug Double Rumble in Mandaue sa Agosto 18 nga magsugod sa alas 6 sa hapon.

Samtang si Mayor Gabriel Luis Quisumbing ang gikatakda nga mopadangat sa iyang State of the City Address (SOCA) sa Agosto 29 sa Mandaue City Sports and Cultural Complex.

Gikatakda usab ang ground breaking ceremony sa tukuron nga government center sa  Agosto 30 ug sa gabii sa maong adlaw ipahigayon ang Taxpayers Awards Night sa Bai Hotel.

Sa Septiyembre 8 ipahigayon ang mga kalihukan sa Himsug Mandaue sa Mandaue City Sports and Cultural Complex ug magsunod ang Chamber Gala Night ug Mandaue Awards Night sa Oakridge Pavilion  ingon man ang Bakery World sa J. Center Convention Center. (/GMR)(BANAT NEWS)