Politiko bawal na mag-balhin-balhin og partido

CEBU, Philippines – Dili na mahimo nga magbalhinbalhin og political party ang mga politiko ubos sa bag-ong batakang balaod nga Federal Constitution kon kini mapasar.

Usa sa probisyon sa draft sa federal constitution, bawal mobalhin og partido ang opisyal atol sa iyang termino. Dili usab mahimong mobalhin og partido duha ka tuig sa dili pa ang eleksyon ug duha ka tuig human sa piniliay.

Ang makalapas niini, mamahimong matangtang sa posisyon ug dili na ma-appoint sa usa ka posisyon sa gobiyerno ug dili kadagan sa sunod nga eleksyon.

Matud ni Atty. Randolph Parcasio, membro sa Consultative Committe to Review the 1987 Constitution nga anaa ang maong probisyon sa special feature sa draft constitution paglikay nga magbalhinbalhin lang ang politiko sa partido alang sa personal nga interes niini.

Matod niya nga kinahanglan adunay prinsipyo ang usa ka opisyal sa gobiyerno ug dili mobalhin sa partido sa kasamtangang administrasyon aron makapabor.

Samtang nitug-an si kanhi Cordova Mayor Adelino Sitoy kinsa maoy Presidential Adviser on Legislative Affairs nga siya ang nisugyot nga mahimong buwag nga state ang Probinsya sa Sugbo.

Si Sitoy kinsa mao usab ang pangulo  sa Presidential Legislative Liaison Office (PLLO) nagkanayon nga walay problema kon maglahi ang probinsya sa Sugbo gikan sa ubang Probinsya sa Central Visayas.

Atol sa info-drive kalabot sa Pederalismo ug presentasyon sa draft sa federal constitution nga gitambongan sa mga elected opisyal sa Sugbo kagahapon, si Sitoy nagkanayon nga ang Negros Oriental maipon na sa Negros Occidental aron maipon isip Negros island.

Samtang ang Bohol matod niya nga mamahimo ra nga maipon sa Leyte ug Samar. Nipasabot si Sitoy nga alkanse ang Bohol sa Sugbo kon mag-ipon kon ikonsiderar lang ang populasyon.

Ang lalawigan sa Bohol adunay 1.3 milyon nga populasyon samtang ang Probinsya sa Sugbo anaa sa 5 milyon ang  populasyon.

Si Undersecretary Antoni Gallardo sa PLLO nagkanayon usab nga dato ug dako ang probinsya sa Sugbo.  "It is so huge, it is so big, it is so rich," matud ni Gallardo. (/IBM)(BANAT NEWS)