CEBU, Philippines – Usa ka durugista ug mamalitay og drugas ang nasikop sa operatiba sa Talisay City Police Station sa niaging gabii sa Sitio Kilawan, Barangay Tangke.
Nakadawat og impormasyon ang kapolisan labot sa ilegal nga kalihukan ni Joseph Labuca, 46, hinungdan nga gihimo ang operasyon.
Nikagat si Labuca ug nakuhaan og 25 ka gagmay nga pakete sa shabu nga balor og P14,750.
Samtang sa pagbiya na sa kapolisan nakit-an ang duha ka lalaki nga adunay kadudahan ang lihok.
Dihang gisita nakit-an nga nagbitbit og drugas sila si Christian Christopher Jose alyas Longkoy, 21, ug John Chriscelo Rosario alyas Balud, pulos taga Inayawan, Siyudad sa Sugbo.
Si Jose nakuhaan og 14 ka gagmay nga ilegal nga drugas ug .38 revolver nga aduna’y upat ka bala samtang pito ka gagmay nga shabu ang nakuha gikan ni Rosario.
Si Jose nibutyag nga nagbantay siya sa iyang asawa sa tambalanan dihang naabot si Rosario ug sila nagkasabot nga manuyop aron sila makasustiner sa binuntagay nga pagbantay sa iyang kapuyo apan sa ilang pagpalit gidemalas og nasikop.
Si PO2 Marlon Añabeza niingon nga posibleng tinuod ang estorya ni Jose tungod sa ID nila gikan sa hospital nga sila watcher sa pasyente.
Apan siya nagkanayon nga dili kini rason nga sila buhian tungod kay nakahimo man sila og salaud.
Gawas pa ila sab susihon ang background sa dinakpan kung nganong adunay armas. (/GMR)(BANAT NEWS)