Hadlok motambong sa hearing

CEBU, Philippines – Tungod sa nahitabo sa mga inmates sa Talisay City Jail nga gi-ambush patay samtang padung sa hearing sa ilang kaso, dunay mga inmates sa Cebu City Jail nga nangahadlok nga motambong sa ilang court hearings kay basin maparehas sila sa nahitabo sa Talisay.

Sigon sa warden sa Cebu City Jail Supt. Renante Rubio niadtong adlaw’ng Martes dunay mga inmates ang dili gustong mokuyog sa court hearings apan nakumbinsir nila kini sanglit ma-contempt of court man pud sila kung dili motambong sa hearing.

Hinoon si Supt. Rubio miingon nga natural emotion kini sa tawo apan kini mitataw nga mihimo sila sa ilang trabaho ug kini midugang nga dili angay mahadlok ang inmates kun wala’y sala nga nahimo.

“Natural ra na nga naa gyuy mahadlok pero ang ako nganong mahadlok man ka kung wa kay sala? Ang mahadlok mga sad-an man lang so it’s about time kung may mga binuang sila nga gipangbuhat it’s about time to stop na. In our end naman we are doing our job also to protect them also kay mao man ni among trabaho so nganong mahadlok man,” matud ni Rubio.

Atol sa nahitabong ambush sa Talisay, walay nahimo ang duha ka jailguards sa tulo ka inmates sa dihang gilibotan og napulo ka tawo ang ilang sakyanan pipila ka metros gikan sa ilang prisohan samtang padung sa court hearing. Ang tulo ka inmates gipamusil diha sa sud sa sakyanan samtang gidisarmahan ang mga escorts. Si Rubio miingon nga gipangandaman na nila kini inabagan sa kapulisan ug BJMP Regional Office.

Nasayran nga midangop kang Konsehal Dave Tumulak, Deputy Mayor for Police Matters ug Chairman sa Committee on Public Order and Safety ang mga pamilya sa mga piniriso kay nabalaka sila sa kaluwasan sa ilang mga binilanggong mahal sa kinabuhi.

Nagpadala na og suwat ang konsehal sa OIC City Director sa Cebu City Police Office Supt. Artemio Ricabo ug nasuta nga duna nay mga police personnel nga gipakatap sa Lahug area paingon sa Gorordo Avenue, General Maxilom ug S. Osmeña.

“Ato sang nahinabi ang mga piniriso ila gyud giangkon nga makuyawan sila ug mihangyo sila kung mahimo katong mga high profile inmates i-separate og sakyanan kay basin niya simbako mapareha sa Talisay madamay sila nga mga minor cases lang.

Unya atong nahinabi ang warden dili man mahimong i-separate kay usa ra man ilang sakyanan,” asoy ni Tumulak. (/IBM)(BANAT NEWS)