Nmis nipasalig, karne sa merkado luwas

CEBU, Philippines – Nipasalig ang National Meat Inspection Services (NMIS) sa Rehiyon 7 nga luwas sa konsumedor ang mga karne nga anaa sa kamerkaduhan.

Kini naglakip sa mga frozen meat nga anaa sa mga supermarket sanglit regulated kini nga mga produkto.

Matud ni Dr. Alvin Leal sa Accreditation and Registration Division sa NMIS-7 nga gawas sa mga giila nga ihawan sa Dakbayan sa Talisay, Mandaue ug duha sa Lalawigan sa Bohol, gitabangan usab nila ang ubang ihawan sa mga lokal nga kagamhanan aron makakuha og accreditation.

Matud sab ni NMIS-7 Regional Director, Dr. Roseller Manalo, nga dunay gisubay nga lagda ang mga imported nga frozen meat.

Sumala pa niya nga duna gisunod nga lagda ang mga manindahay og karne sama sa limpyo nga sakyanan nga kargahan, limpyo ang pasilidad ingon man adunay health certificate ang  mga empleyado.

Awhag sab ni Leal sa mga konsumedor nga dili magpataka og hikap sa karne ingon man pagbutang sa kwarta ibabaw niini aron dili makontaminado ang karne diha sa merkado.

Gipahibawo ni Leal nga gawas nga ilang gi-edukar ang mga manindahay ug trabahante, lakip sab ang mga konsumedor ang adunay responsibilidad. (/GMR)(BANAT NEWS)