Enforcers gipasidunggan ni Quisumbing

CEBU, Philippines – Wala damha sa usa ka traffic enforcer nga hatagan kini og P5,000 nga cash reward dihang gipatawag sa miaging adlaw sa buhatan ni Mayor Luigi Quisumbing.

Si Camelo Cobarde, Jr. maoy gihatagan og pahalipay ni Quisumbing tungod sa pagkamatinud-anon niini sa iyang trabaho pinaagi sa pagpatuman sa mga lagda sa trapiko.

Gawas sa cash reward gihatagan usab ni Quisumbing si Cobarde og certification sa iyahang pagdakop sa chief of staff sa mayor nga si Atty. Elaine Bathan kinsa nakalapas sa lagda sa trapiko samtang nagmaneho kini sa iyang sakyanan.

Matud ni Quisumbing nga dili tiaw ang bation niyang kalipay kon iyang masayran nga hangtud karong panahona naa pa gihapon ang pipila ka mga traffic enforcer nga matinud-anon gihapon nga nagtuman sa ilang katungdanan,

Nunot niini, si Mayor Quisumbing mihatag usab og ganti nga  P10,000 ngadto sa tulo ka traffic enforcer nga nagtinabangay usab sa paggukod sa snatcher ug nasikop gyud kini. (/BDB)(BANAT NEWS)