CEBU, Philippines — Lima ka mga Koreano ang gisikop sa National Bureau of Investigation (NBI) Central Visayas Miyerkules sa gabii didto sa Dakbayan sa Lapu-Lapu tungod sa pag-operate og online illegal gambling. Ang gidakop mao sila si Kim Sung Youl, Dae Seung Moo, Yang Wondong, Yong Ji ug Jun Song. Nadakpan sila atol sa duha ka operasyon nga gihimo sa NBI pinaagi sa search warrant.
Ang maong mga Koreano nadakpan sa giabangang balay sa Barangay Pajo ug Basak sa maong dakbayan.
Matud ni Patricio Bernales Jr. ang regional director sa NBI-7 nga taudtaod na nila nga gipaubos sa surveillance ang maong Koreano kansang parokyano nagbase sa abroad.
Gipangita pa ang lain nilang kauban nga sila si Kim Young Rok ug Ji Yong Jim.(Romeo T. Limpangog/IBM)(BANATNEWS)