Usa patay 14 nasikop sa buy- bust

CEBU, Philippines — Usa ang patay ug 14  ka mga nalambigit sa ilegal nga drugas ang nasikop sa managkalahing buy-bust operations sa kapolisan sa Lapu-Lapu City Police Office (LLCPO).

Si  Chief  Inspector Jaime  Tolentino nga maoy hepe sa Presinto 5 sa LLCPO miila sa namatay nga mao si Ronie Marfil  Mayol alyas Ronie diha sa Sitio  Saac,  Barangay Buaya.

Matud pa niya may nisumbong kanila bahin sa pagpamaligya ni Mayol og drugas hinungdan sa gihimong operasyon.

Apan giingong atol sa transaksyon, nakabantay kini nga polis iyang kasabot ug diretsong nibunot og armas nga kalibre 38 apan naunhan kini sa backup nga polis ug patay na pag-abot sa Lapu-Lapu City  Hospital.

Sa crime scene maoy ilang napalgan ang 15  ka gagmay nga paketeng shabu ug ang armas sa suspek nga adunay mga bala.

Samtang sa laing operasyon diha sa Bankal, Canjulao   nasikop ang 14 ka mga durugista nga niresulta sa pagkasakmit sa gibanabanang P200 mil nga shabu. (BANAT NEWS)