CEBU, Philippines — Laing grupo sa Partido Demokratiko Pilipino-Lakas ng Bayan (PDP-Laban) ang nitumaw sa pagkakaron samtang ang laing grupo ang nagsige na og palapad sa partido ngadto sa kalungsuran sa Lalawigan sa Sugbo.
Ang grupo sa PDP-Laban nga gipangulohan ni Cebu Provincial Council president Nixon “Jojo” Dizon nagpahigayon og trainor’s training niadtong Sabado apan ang grupo nilang Atty. Bicbic Garcia nga taga General Santos City ang nagpahigayon sab og basic membership seminar (BMS) sa pipila ka indibidwal sa Dakbayan sa Sugbo.
Si Garcia ang presidente sa PDP-Laban sa Region XII ug niangkon nga maoy National Council chairman. Kauban niya sila si Abbin Dalhani, presidente sa PDP-Laban National Capital Region (NCR) isip National Council vice chairman; Reymar Mansilungan, presidente sa Region V, ug Crisostomo Gotladera sa Pag-IBIG Fund isip trustee.
Apan dali nga gisalikway ni Dizon ang maong grupo. “Dili na PDP-Laban, dili na acknowledge sa PDP-Laban,” matud ni Dizon. Giklaro ni Dizon nga ang National Council gipangulohan nilang Presidente Rodrigo Duterte isip chairman, Energy Secretary Alfonso Cusi isip vice chairman, Senador Aquilino “Koko” Pimentel III isip presidente, ug House Speaker Pantaleon Alvarez isip secretary-general.
Apan matud ni Garcia nga ang maong mga opisyal nga gitumbok ni Dizon wala naglihok sukad nabutang sa pwesto sa gobiyerno lakip na si kanhi Department of Environment and Natural Resources Undersecretary, karon chairman sa Presidential Commission for the Urban Poor, Noel Felongco.
Hinoon si Garcia niila gihapon ni Felongco isip presidente sa PDP-Laban Region VII isip tinudlo ni Duterte sa wala pa ang eleksiyon sa 2016.
“That’s why we are here, nisulod ta kay wala man sila naglihok. We appreciate Dizon very much and we want to reach him out,” matud ni Garcia.
Gipasabot ni Garcia nga wala sila nasayod nga adunay grupo sa PDP-Laban sa Sugbo nga gipangulohan ni Cebu City Vice Mayor Edgar Labella ug Dizon sa Lalawigan sa Sugbo sanglit wala sila nakig-alayon sa ilang mga kalihukan ingon man wala moapil sa mga tigum. Matud niya nga mismo si Felongco wala na nitaho kanila kung unsay nahitabo sa partido sa Sugbo ug sa Central Visayas.
Si Garcia nidugang nga kadtong nangapil sa mass oath nga gipangulohan ni Alvarez ug gisalmutan sa 50,000 ka tawo sa Dakbayan sa Sugbo niadtong Nobiyembre dili pa matawag nga sakop sa partido hangtud dili sila kapaubos sa BMS.
Karong Hulyo 27, ang PDP-Laban magpahigayon og national assembly sa Quezon City diin magpili sila og mga opisyal. (BANAT NEWS)