CEBU, Philippines — Dul-an 50 ka mga gituohang mga paltik nga armas ang nasakmit sa hiniusang operasyon sa kapulisan sa Lungsod sa Samboan ug Philippine Coast Guard sa pantalan diha sa may Barangay Sebastian, Samboan niadtong Sabado sa gabii diin tulo ka mga tawo usab ang nasikop.
Ang nasikop nga gidudahang gun runners mao ang magtiayong sila si Evelino Cubol, 36, ug asawa nga si Flora Mae, 37, ug Maria Bella Manit, 54, pulos taga Barangay Suba, sa Dakbayan sa Danao.
Matud pa ni Police Inspector Mikhail Mallorca, acting chief sa Samboan Police Station, nakadawat sila og tawag gikan sa Philippine Coast Guard nga adunay mga pasahero nga ilang gi-hold tungod sa kadudahang kargamento.
Matud pa nga ang K9 Dog unit nga nagbantay nakamatikod og kontrabando sa mga kargamento sa tulo.
Sumala pa ni Mallorca, atol sa ilang pagsusi didto nila nakita ang 46 ka buok nga mga kalibre .45 pistola nga adunay lainlaing serial numbers ug aduna usab pito ka bala nga gipasukip niini.
Dugang pa ni Mallorca, base sa inisyal nga kasayuran ilang nasayran dad-on sa Dipolog City ang maong mga armas. Kasong kalapasan sa RA 10591 ang ipasaka sa mga suspetsado kinsa kasamtangan karon nga gitanggong sa Samboan Police Station. (BANAT NEWS)