CEBU, Philippines — Suportado sa usa ka pundok ang balaodnon nga nagtumong sa pagdili sa paggamit og plastic bags sa mga establisamento sa Dakbayan sa Sugbo.
Si Fr. Romeo Cagatin, executive director sa Justice, Peace and Integrity of Creation - Integrated Development Inc. pabor sa maong lakang sa dakbayan base sa position paper nga iyang gisumitir sa city council niadtong Hulyo 2.
Matud niya nga tumong sa ilang organisasyon nga mawagtang na ang paggamit og plastik sa tanang Local Government Units.
Matud ni Cagatin nga bisan pa man nga ang maong lakang ni Konsehal Raymond Alvin Garcia nagdili lang sa paggamit sa plastic bags sa dakbayan apan mamahimo pang amendahan ug mapalapdan pa kini sa umaabot nga katuigan.
Sa pagkakaron ang ordinansa sa siyudad mao lang ang pagdili og gamit og plastic bags sa matag adlaw nga Miyerkules ug Sabado sa matag semana.
Matud usab ni Cagatin nga kinahanglan nga adunay mga deputized law enforcer nga mopahinumdum ug modakop sa mga tawo nga mopataka og labay sa ilang basura nga plastik.
Ug kinahanglan usab nga ma-edukar ang katawhan sa dautang epekto sa pagpatuyang og labay og basurang plastik.
Gihangyo usab niya nga hingusgan ang pag-implementar sa programa sa solid waste management sa dakbayan. (/BDB)(BANATNEWS)