Unom ka balay sa DAS naugdaw

CEBU, Philippines – Gibana-banang mokabat sa P200 mil ang danyos sa sunog nga niigo sa Don Andres Soriano (DAS), Dakbayan sa Toledo kagahapon sa buntag.

Nadawat sa kabomberohan ang alarma alas 8:10 sa buntag nga gipaubos sa second alarm.

Matud ni Senior Fire Officer 3 Leonard Clarido, station commander sa DAS Fire Sub-Station, nga adunay nakasaksi nga giingong gikan sa panimalay sa usa ka Francisca Mantorillas nagsugod ang kayo.

Giingong nadungog sa mga residente ang pagbuto sulod sa maong panimalay diin adunay nag-ingon nga butane canister ang nibuto.

Matud sa kabomberohan nga ilang susihon ang maong pasangil.

Niabot sa unom ka panimalay ang naugdaw ug laing tulo ka panimalay ang nakan-an sa kayo.

Ang mga apektadong residente kasamtangan gipahimutang sa DAS Barangay Hall. (Raymond D. Abarcas/GMR)

Balor og P1.5M marijuana gipanglarot

Mokabat sa P1.5 milyones nga balor sa marijuana ang nalarot sa Bayong, Balamban niadtong Miyerkules sa hapon.

Sumala pa sa Balamban Police Station nga nakadawat sila og impormasyon nga adunay bakanteng yuta sa maong barangay ang gitamnan og mga marijuana.

Kini ang hinungdan nga gironda sa kapolisan ug gipanglarot ang mga marijuana nga niabot sa 3,824 ka punoan nga balor og P1,529,600.

Apan wala nailhi kun kinsa ang tigtanum sa maong mga marijuana.

Nunot sa kadaghan, gipangsunog na lang sa mga operatiba ang uban niini samtang ang pipila gidala sa Regional Crime Laboratory Office-7 aron ipaubos sa eksaminasyon. (/GMR)(BANAT NEWS)