Cebu-Cordova bridge gisugdan na
CEBU, Philippines – Gikalipay sa presidente ug general manager sa Cebu-Cordova Link Expressway (CCLEX), Allan Alfon, ang hingpit na nga pagsugod kagahapon sa trabaho sa taytayan.
Matud ni Alfon nga adunay Divine Providence ang pagsugod sa trabaho nga gisugdan sa usa ka blessing nga gipahigayon ni Auxiliary Bishop Dennis Villarojo.
Gipaabot nga mahuman sa tuig 2021 atol usab sa kasaulogan sa ika-500 ka tuig sa Kristiyanismo sa Pilipinas ang proyekto nga balor og P30 bilyones.
Matud ni Villarojo nga angay sab i-ampo kanunay ang mga tawo nga nagpaluyo ug nagtrabaho sa maong proyekto.
Si kanhi Cordova mayor Adelino Sitoy, Presidential Adviser on Legislative Affairs, mapasalamaton nga nahimo na gyud nga tinuod ang iyang damgo tungod kay mailhan na sab ang ilang lungsod.
Sugyot ni Sitoy nga nganlan ang taytayan og Santo Niño Bridge nga magsumpay sa Isla sa Mactan agi sa Cordova ug Dakbayan sa Sugbo.
Lakip sa nanambong sa kalihukan kagahapon mao sila si Cebu City Mayor Tomas Osmeña, Cordova Mayor Mary Therese Sitoy-Cho, Department of Public Works and Highways Secretary Mark Villar, Metro Pacific Investments Corporation (MPIC) President ug CEO Jose Ma. Lim, Metro Pacific Tollways Corporation President ug CEO Rodrigo Franco ug uban pa.
Usa ka mubo nga programa ang gipahigayon sa luna sa Cebu Ports Authority atbang sa Compania Maritima Building diin ang mga partisipante nisakay og yate paingon sa piling area sa Cebu-Mactan Channel duol sa Shell Island (CCLEX Tower 2) diin si Villarojo ang nangulo sa blessing ceremony.
Gipahalipayan ni Osmeña ang chairman sa MPTC, Manny Pangilinan, ug ang grupo isip partner sa kalambuan sa Sugbo ug gipadayag niini ang iyang kalipay tungod kay maghatag gyud og dakung kausaban dili lang sa Cordova ug sa siyudad apan lakip na sa ubang lugar sa Probinsiya sa Sugbo.
Apan sa pamahayag sa mayor wala makalingkawas ang mga konsehal sa oposisyon sa siyudad sa iyang pika gumikan sa pagbasura sa P18 bilyones nga Kawit Island Project gumikan sa pamolitika. (Decemay P. Padilla/GMR)(BANAT NEWS)
- Latest
