CEBU, Philippines — Hawan ug mga basura na lang ang naabtan sa mga bag-ong napiling barangay officials sa Barangay Day-as, Dakbayan sa Sugbo atol unta sa unang adlaw sa ilang paglingkod kagahapon.
Ang newly elected barangay captain sa Day-as nga si Freddie Esmas mireklamo human wala silay naabtan nga butang sud sa barangay hall ug wala usab mipakita kanila ang mga karaang opisyal alang unta sa usa ka ‘turnover’ ceremony.
"Dili lang ko mo-accuse nga gipangkuha basta nawala (ang mga gamit) na lang diri sa barangay hall. Mo turn-over gani unta sila ron apan wala sila. Ang mga records wala gyud, financial records wala, mga documents nga mo-support sa finance transactions wala, listings sa mga barangay properties wala gihapon," matud pa ni Esmas. "So practically zero g'yud, they are leaving us in limbo, wa pa mi kasabot kay wa man tanan bisan og silya ug lamisa wala...Basura ilang gibilin," matud pang Esmas.
Si Esmas uban sa iyang mga konsehales ug mga supporters miabot sa barangay hall nga nadismaya sa ilang naabtan sa maong duha ka andana nga building.
"Sa ubos adunay TV, aircon, filing cabinet apan na wala na. Ang taas nga portion maoy pait kaayo'g kahimtang kay wala na g'yud nahabilin," dugang pa ni Esmas.
Si Esmas wala direkta nga mipasangil sa kanhi barangay captain nga si Jerome Puerto, apan miangal siya tungod sa nakita niyang walay tarong nga pagalam ang barangay hall.
"Wala mi mamasangil nila nga ilang gidala ang mga butang, ang amoa lang hain na, i-turn over na namo kay kami may mopuli?” pangutana pa niya.
Gidugang ni Esmas nga ilaha na kining gisumbong ngadto sa Department of Interior and Local Government Unit (DILG) ug paabuton na lang nila ang aksyon sa maong ahensya.
Sa pagkakaron, ang mga opisyales sa barangay Day-as kasamtangan una nga mopahiluna didto sa ilang gymnasium. Suwayan usab nila og duol si Mayor Tomas Osmeña ug Congressman Raul Del Mar aron sa pagpangayo og tabang.
Gisuwayan ning tigbalita pagkuha sa iyang habig ni Puerto apan wala pa kini mitubag sa mga tawag sa iyang telepono. (/IBM)(BANATNEWS)