CEBU, Philippines – Mga kaubang polis ni SPO1 Adonis Dumpit wala moduaw sa iyang haya sukad nga kini naabot niadtong Huwebes sa Cosmopolitan Funeral Chapels diha sa downtown area sa Dakbayan sa Sugbo.
Kini tungod matud pa nabalaka silang mga suod nga higala ug mga kaubanan kaniadto ni Dumpit nga mapasanginlang nalambigit usab sa ilegal nga drugas nga maoy gipasangil ngadto sa namatay nga polis.
Apan si Konsehal Dave Tumulak, Deputy Mayor for Police Matters kinsa usa ka kanhi tigbalita ug naka-cover usab sa mga trahabo ni Dumpit kaniadto miingon, kinaiya na sa tawo ang paghatag og kataposang pagyukbo sa nitaliwang higala o kaila ug dili makiangayon kon did-an ang tawo nga makaduaw.
“Not only to disrespect SPO1 Adonis Dumpit, but it also disrespects the police itself. Ang iyahang privacy ug ang polis (nga) wala’y involvement sa illegal activities anytime pwede siya makabisita as a friend sama gud nato tanan kita mga amigo ni Adonis Dumpit bisan kinsa pwede makabisita. Og mobisita ta nagpasabot ba nga we are involved in illegal? Dili, as a Christian ato nang moral obligation to pay respect sa atoang mga close friends nga namatay,” sigon ni Tumulak.
Tungod niini gihangyo ni Tumulak ang mga polis ilabi na kadtong nanawag kaniya nga gustong mobisita sa haya apan mahadlok nga moduaw kon wala silay gihimong dautan. Sa iyang bahin, si PRO-7 director Chief Supt. Debold Sinas miklaro nga wala did-i ang mga classmates ug ang mga kaubang polis ni Dumpit pagbisita sa haya niini.
Apan iyang giangkon nga kadtong moduaw didto ilang pakuhaan og hulagway. Wa usab siya mohatag og rason kon nganong ilaha kining buhaton. “Wala namo gibawalan. Picture-an lang namo sila nga nangadto mo. Mahadlok sila? Aw, problema na na nila basta kami wala namo sila gibawalan,” si Sinas nagkanayon.
Armas di iya
Sa laing bahin, ang armas nga giingong nakuha gikan ni Dumpit gipanag-iya ni Tejero Barangay Kapitan Jessielou Cadungog.
Si Cadungog nga nakahinabi sa Banat News nagkanayon nga gipalit ni Dumpit ang iyang armas niadto pang Disyembre 11, 2017.
Si Dumpit sakop kaniadto sa Special Weapons and Tactics ug nabantog nga sharpshooter ug premyado sa mga kompetisyon.
Apan human siya nabalik sa serbisyo gikan napriso tungod sa pagkapatay niini sa usa ka gipasanginlang tulisan nga menor de edad, wala na siya giisyuhan og balik og armas hangtud nga kini gidestino didto sa Bohol. Tungod kay kumpare silang duha wala makabalibad si Cadungog nga datadatahan ni Dumpit og P80 mil ang iyang armas.
“Data-data ang iyang pagpalit. Wala pa gani na naimpas. Iyang na data ang total P20 mil pa. Pag Abril 2018 siya last nidata,” si Cadungog miingon.
Kagahapon gisumitir ni Cadungog ang kopya sa maong deed of sale ug ang ubang papeles sa maong armas ngadto sa National Bureau of Investigation 7.
Hangtud karon giangkon sa kapitan nga silang taga Barangay Tejero dili makatuo nga nalambigit sa drugas si Dumpit kay sa dihang nagpuyo pa kini sa ilang barangay kontra kaayo niini ang mga durugista ug nagkinto ang tanang badlungon sa maong polis.
Nakapangutana si Cadungog kon tinuod ba gyud ang pasangil nga narco-cop si Dumpit kay pirmi man kining walay kwarta.
“Kadtong second week sa Mayo namarayeg nga manghuwam og kwarta para sa eskuyla sa iyang anak. Gitagaan nako’g dos mil,” si Cadungog miingon.
Sa laing bahin, si Sinas miingon nga wala gyuy police honors sa lubong ni Dumpit ug wala kini makuhang benepisyo gawas na lang sa iyang accumulative leave.
“Among palisiya basta ingon anang mga police nga involved (sa drugs), we give our respect to the dead but there are some protocols and procedures nga dili namo pwede ihatag sa iyaha,” tubag ni Sinas bahin sa tinguha ni Cebu City Mayor Tomas Osmeña nga hatagan og desenteng lubong si Dumpit.
Viral pictures
Gihatagan usab og katin-awan ni Sinas ang mi-viral sa social media nga hulagway diin nagbuy-od ang lawas ni Dumpit nga walay armas sa unang hulagway apan sa sunod nga hulagway, duna na.
Matud niya husto kadto nga hulagway kinuha sa mga sakop sa Scene of the Crimes Operatives apan wala makahatag og klarong eksplinasyon. Si Dumpit napatay atol sa pinusilay tali sa mga operatiba sa NBI-7 ug PRO-7 Regional Special Operations Group niadtong Miyerkules sa buntag ug giingong nakuhaan kini og 15 ka dagkong pakete sa gituohang shabu nga gibana-banang mobalor na ngadto sa kapin usa ka milyon ka pesos. (Camille Pateres/IBM)(BANAT NEWS)